ਭਾਰਤ

(ਫੋਟੋ:-ਗ੍ਰਹਿ ਮੰਤਰਾਲੇ ਵਲੋਂ ਹੁਕਮ ਦੀ ਚਿੱਠੀ)

ਲਾਕਡਾਊਨ 'ਚ ਫਸੇ ਲੋਕ ਹੁਣ ਆਪਣੇ ਘਰ ਪਰਤ ਸਕਣਗੇ, ਹਦਾਇਤਾਂ ਜਾਰੀ

ਨਵੀਂ ਦਿੱਲੀ, ਅਪ੍ਰੈਲ 2020 -(ਏਜੰਸੀ ) - ਕੇਂਦਰੀ ਗ੍ਰਹਿ ਮੰਤਰਾਲੇ ਨੇ ਵੱਖ-ਵੱਖ ਥਾਵਾਂ 'ਤੇ ਫਸੇ ਪ੍ਰਵਾਸੀ ਮਜ਼ਦੂਰਾਂ, ਸੈਲਾਨੀਆਂ, ਵਿਦਿਆਰਥੀਆਂ ਆਦਿ ਦੀ ਆਵਾਜਾਈ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਗ੍ਰਹਿ ਮੰਤਰਾਲੇ ਵੱਲੋਂ ਜਾਰੀ ਆਦੇਸ਼ 'ਚ ਕਿਹਾ ਗਿਆ ਹੈ ਕਿ ਸਾਰੇ ਰਾਜ ਅਤੇ ਕੇਂਦਰ ਸ਼ਾਸਤ ਸੂਬੇ ਆਪਣੇ ਰਾਜ 'ਚ ਫਸੇ ਲੋਕਾਂ ਨੂੰ ਉਨ੍ਹਾਂ ਦੇ ਗ੍ਰਹਿ ਰਾਜਾਂ 'ਚ ਭੇਜਣ ਅਤੇ ਦੂਜੀਆਂ ਥਾਵਾਂ ਤੋਂ ਆਪਣੇ ਨਾਗਰਿਕਾਂ ਨੂੰ ਲਿਆਉਣ ਲਈ ਇਕ ਮਾਨਕ ਪ੍ਰੋਟੋਕਾਲ ਤਿਆਰ ਕਰਨ। ਭਾਵ, ਹੁਣ ਹਰ ਰਾਜ ਦੂਜੇ ਰਾਜਾਂ 'ਚੋਂ ਆਪਣੇ ਨਾਗਰਿਕਾਂ ਨੂੰ ਵਾਪਸ ਲਿਆ ਸਕੇਗਾ ਅਤੇ ਆਪਣੇ ਰਾਜ 'ਚ ਫਸੇ ਦੂਜੇ ਰਾਜਾਂ ਦੇ ਨਾਗਰਿਕਾਂ ਨੂੰ ਉੱਥੇ ਭੇਜ ਸਕੇਗਾ। ਗ੍ਰਹਿ ਮੰਤਰਾਲੇ ਵੱਲੋਂ ਜਾਰੀ ਹਦਾਇਤਾਂ ਅਨੁਸਾਰ, ਇਹ ਲੋਕ ਕੁਝ ਸ਼ਰਤਾਂ ਨਾਲ ਹੁਣ ਆਪਣੇ ਘਰ ਜਾ ਸਕਣਗੇ। ਇਸ ਲਈ ਰਾਜ ਸਰਕਾਰਾਂ ਉਨ੍ਹਾਂ ਦੀਆਂ ਬੱਸਾਂ ਦਾ ਪ੍ਰਬੰਧ ਕਰਵਾਉਣਗੀਆਂ। ਗ੍ਰਹਿ ਮੰਤਰਾਲੇ ਨੇ ਬੁੱਧਵਾਰ ਨੂੰ ਹਦਾਇਤਾਂ ਜਾਰੀ ਕਰਦੇ ਹੋਏ ਰਾਜਾਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਉਹ ਆਪਣੇ ਰਾਜ 'ਚ ਲੋਕਾਂ ਨੂੰ ਵਾਪਸ ਬੁਲਾਉਣ ਅਤੇ ਉਨ੍ਹਾਂ ਨੂੰ ਭੇਜਣ ਲਈ ਨੋਡਲ ਅਥਾਰਟੀ ਅਤੇ ਨਿਯਮ ਬਣਾਉਣ। ਇਹ ਨੋਡਲ ਅਥਾਰਟੀ ਆਪਣੇ ਰਾਜਾਂ 'ਚ ਫਸੇ ਲੋਕਾਂ ਦੀ ਰਜਿਸਟੇਰਸ਼ਨ ਵੀ ਕਰੇਗੀ। ਗ੍ਰਹਿ ਮੰਤਰਾਲੇ ਦੀਆਂ ਨਵੀਆਂ ਹਦਾਇਤਾਂ ਅਨੁਸਾਰ, ਜੇਕਰ ਕਿਸੇ ਰਾਜ 'ਚ ਫਸਿਆ ਕੋਈ ਵਿਅਕਤੀ ਦੂਜੇ ਰਾਜ 'ਚ ਜਾਣਾ ਚਾਹੁੰਦਾ ਹੈ ਤਾਂ ਇਸ ਲਈ ਦੋਵੇਂ ਰਾਜਾਂ ਦੀਆਂ ਸਰਕਾਰਾਂ ਆਪਸ 'ਚ ਗੱਲਬਾਤ ਕਰਕੇ ਉੱਚਿਤ ਕਦਮ ਚੁੱਕਣ। ਲੋਕਾਂ ਨੂੰ ਸੜਕ ਦੇ ਰਸਤੇ ਲਿਜਾਇਆ ਜਾਵੇ। ਲੋਕਾਂ ਨੂੰ ਭੇਜਣ ਤੋਂ ਪਹਿਲਾਂ ਸਾਰਿਆਂ ਦੀ ਮੈਡੀਕਲ ਜਾਂਚ ਕੀਤੀ ਜਾਵੇ। ਜੇਕਰ ਕੋਰੋਨਾ ਵਾਇਰਸ ਇਨਫੈਕਸ਼ਨ ਦਾ ਕੋਈ ਲੱਛਣ ਨਹੀਂ ਪਾਇਆ ਜਾਂਦਾ ਤਾਂ ਉਨ੍ਹਾਂ ਨੂੰ ਜਾਣ ਦੀ ਮਨਜ਼ੂਰੀ ਦਿੱਤੀ ਜਾਵੇ। 

 ਨਵੀਂ ਦਿੱਲੀ , ਅਪ੍ਰੈਲ 2020 -(ਏਜੰਸੀ)- 

ਦੇਸ਼ ਵਿਚ ਕੋਰੋਨਾ ਵਾਇਰਸ ਦੇ ਮਾਮਲੇ ਵਧ ਕੇ 28 ਹਜ਼ਾਰ ਦੇ ਕਰੀਬ ਪਹੁੰਚ ਗਏ ਹਨ। ਦੇਸ਼ ਵਿਚ ਕੋਰੋਨਾ ਨਾਲ ਮਰਨ ਵਾਲਿਆਂ ਦਾ ਅੰਕੜਾ ਵੀ ਵਧ ਕੇ ਲਗਪਗ 900 ਤਕ ਪਹੁੰਚ ਗਿਆ ਹੈ। ਕੇਂਦਰੀ ਸਿਹਤ ਅਤੇ ਪਰਿਵਾਰ ਕਲਿਆਣ ਮੰਤਰਾਲੇ ਦੇ ਤਾਜ਼ਾ ਅੰਕੜਿਆਂ ਮੁਤਾਬਿਕ ਸੋਮਵਾਰ (27 ਅਪ੍ਰੈਲ) ਸਵੇਰੇ 8 ਵਜੇ ਤਕ ਦੇਸ਼ ਵਿਚ ਕੋਰੋਨਾ ਵਾਇਰਸ ਦੇ ਹੁਣ ਤਕ 27,892 ਮਾਮਲੇ ਸਾਹਮਣੇ ਆ ਚੁੱਕੇ ਹਨ।

ਉੱਥੇ ਹੀ ਦੇਸ਼ ਵਿਚ ਕੋਰੋਨਾ ਵਾਇਰਸ ਕਾਰਨ ਮਰਨ ਵਾਲਿਆਂ ਦਾ ਅੰਕੜਾ ਵੀ ਵਧ ਕੇ 872 ਤਕ ਚਲਾ ਗਿਆ ਹੈ। ਸਿਹਤ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ ਦੇਸ਼ ਵਿਚ ਆਏ ਕੁੱਲ 27,892 ਮਾਮਲਿਆਂ 'ਚੋਂ 20,835 ਮਰੀਜ਼ਾਂ ਦਾ ਫਿਲਹਾਲ ਇਲਾਜ ਚੱਲ ਰਿਹਾ ਹੈ। ਉੱਥੇ ਹੀ 6185 ਮਰੀਜ਼ ਠੀਕ ਹੋ ਚੁੱਕੇ ਹਨ। ਕੇਂਦਰੀ ਸਿਹਤ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ ਦੇਸ਼ ਵਿਚ ਪਿਛਲੇ 24 ਘੰਟਿਆਂ 'ਚ 1396 ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਇਸ ਦੌਰਾਨ ਦੇਸ਼ ਵਿਚ 48 ਲੋਕਾਂ ਦੀ ਕੋਰੋਨਾ ਵਾਇਰਸ ਕਾਰਨ ਮੌਤ ਹੋਈ ਹੈ।

ਮਹਾਰਾਸ਼ਟਰ 'ਚ ਸਭ ਤੋਂ ਜ਼ਿਆਦਾ ਮਾਮਲੇ

ਸਿਹਤ ਮੰਤਰਾਲੇ ਦੇ ਅੰਕੜਿਆਂ 'ਤੇ ਨਜ਼ਰ ਮਾਰੀਏ ਤਾਂ ਮਹਾਰਾਸ਼ਟਰ ਕੋਰੋਨਾ ਵਾਇਰਸ ਨਾਲ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਸੂਬਾ ਨਜ਼ਰ ਆਉਂਦਾ ਹੈ। ਇੱਥੇ ਕੋਰੋਨਾ ਦੇ ਹੁਣ ਤਕ ਕੁੱਲ 8068 ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਸੂਬੇ 'ਚ ਕੋਰੋਨਾ ਵਾਇਰਸ ਨਾਲ ਮੌਤਾਂ ਦਾ ਅੰਕੜਾ 342 ਤਕ ਪਹੁੰਚ ਗਿਆ ਹੈ। ਹਾਲਾਂਕਿ ਇੱਥੇ 1076 ਮਰੀਜ਼ ਠੀਕ ਵੀ ਹੋ ਚੁੱਕੇ ਹਨ। ਇਸ ਤੋਂ ਬਾਅਦ ਕੋਰੋਨਾ ਨਾਲ ਦੂਸਰਾ ਸਭ ਤੋਂ ਜ਼ਿਆਦਾ ਪ੍ਰਭਾਵਿਤ ਸੂਬਾ ਗੁਜਰਾਤ ਹੈ। ਇੱਥੇ ਕੋਰੋਨਾ ਵਾਇਰਸ ਦੇ ਕੁੱਲ 3301 ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਗੁਜਰਾਤ 'ਚ 151 ਲੋਕਾਂ ਦੀ ਕੋਰੋਨਾ ਵਾਇਰਸ ਕਾਰਨ ਮੌਤ ਹੋ ਚੁੱਕੀ ਹੈ, ਉੱਥੇ ਹੀ 313 ਮਰੀਜ਼ ਇੱਥੇ ਠੀਕ ਹੋ ਚੁੱਕੇ ਹਨ।

ਇਸ ਤੋਂ ਬਾਅਦ ਦਿੱਲੀ ਜੋ ਕਿ ਕੋਰੋਨਾ ਪ੍ਰਭਾਵਿਤ ਸੂਬਿਆਂ 'ਚ ਤੀਸਰੇ ਨੰਬਰ 'ਤੇ ਹੈ, ਇੱਥੇ ਹੁਣ ਤਕ ਕੁੱਲ 2918 ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਕੋਰੋਨਾ ਵਾਇਰਸ ਨਾਲ ਮੌਤਾਂ ਦਾ ਅੰਕੜਾ 54 ਹੈ, ਉੱਥੇ ਹੀ 877 ਮਰੀਜ਼ ਹਸਪਤਾਲ ਤੋਂ ਡਿਸਚਾਰਜ ਹੋ ਚੁੱਕੇ ਹਨ। ਇਸ ਤੋਂ ਬਾਅਦ ਰਾਜਸਥਾਨ 'ਚ ਕੁੱਲ 2185 ਮਾਮਲੇ ਸਾਹਮਣੇ ਆਏ ਹਨ, ਇੱਥੇ ਕੋਰੋਨਾ ਨਾਲ 33 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਉੱਥੇ ਹੀ 518 ਲੋਕ ਹਸਪਤਾਲ ਤੋਂ ਛੁੱਟੀ ਲੈ ਚੁੱਕੇ ਹਨ।

ਮਹਾਰਾਸ਼ਟਰ ਤੇ ਗੁਜਰਾਤ 'ਚ ਸੁਧਰ ਨਹੀਂ ਰਹੇ ਹਾਲਾਤ

ਇੰਡੀਆ 'ਚ 24 ਹਜ਼ਾਰ ਤੋਂ ਜ਼ਿਆਦਾ ਸੰਕ੍ਰਮਿਤ, 723 ਲੋਕਾਂ ਦੀ ਗਈ ਜਾਨ

ਨਵੀਂ ਦਿੱਲੀ,ਅਪ੍ਰੈਲ 2020 -(ਏਜੰਸੀ)-

ਕੋਰੋਨਾ ਇਨਫੈਕਸ਼ਨ ਦੇ ਲਿਹਾਜ਼ ਨਾਲ ਸ਼ੁੱਕਰਵਾਰ ਦਾ ਦਿਨ ਵੀ ਕਾਫੀ ਪਰੇਸ਼ਾਨ ਕਰਨ ਵਾਲਾ ਲੱਗਿਆ। ਵੀਰਵਾਰ ਦੀ ਤੁਲਨਾ 'ਚ ਨਵੇਂ ਮਾਮਲੇ ਤਾਂ ਕੁਝ ਘੱਟ ਸਾਹਮਣੇ ਆਏ ਪਰ 46 ਲੋਕਾਂ ਦੀ ਜਾਨ ਚਲੀ ਗਈ। ਇਨਫੈਕਟਿਡਾਂ ਦਾ ਅੰਕੜਾ 24 ਹਜ਼ਾਰ ਤੋਂ ਪਾਰ ਹੋ ਗਿਆ ਹੈ। ਚੰਗੀ ਗੱਲ ਇਹ ਹੈ ਕਿ ਠੀਕ ਹੋਣ ਵਾਲੇ ਮਰੀਜ਼ਾਂ ਦੀ ਦਰ ਵੀ 20.57 ਫੀਸਦੀ ਹੋ ਗਈ ਹੈ ਤੇ ਹੁਣ ਤਕ ਕਰੀਬ ਪੰਜ ਹਜ਼ਾਰ ਲੋਕ ਸਿਹਤਮੰਦ ਹੋਏ ਹਨ। ਉਥੇ, ਕੇਂਦਰੀ ਸਿਹਤ ਮੰਤਰਾਲੇ ਦੇ ਅੰਕੜਿਆਂ ਮੁਤਾਬਕ ਇਸ ਮਹਾਮਾਰੀ ਨਾਲ ਦੇਸ਼ 'ਚ ਹੁਣ ਤਕ 723 ਲੋਕਾਂ ਦੀ ਜਾਨ ਗਈ ਹੈ ਤੇ 23,452 ਲੋਕ ਇਨਫੈਕਟਿਡ ਹੋਏ ਹਨ। 4,814 ਮਰੀਜ਼ ਹੁਣ ਤਕ ਪੂਰੀ ਤਰ੍ਹਾਂ ਸਿਹਤਮੰਦ ਵੀ ਹੋਏ ਹਨ।

ਸੂੁਬਾ ਸਰਕਾਰਾਂ ਤੇ ਕੇਂਦਰੀ ਸਿਹਤ ਮੰਤਰਾਲੇ ਦੇ ਅੰਕੜਿਆਂ 'ਚ ਇਹ ਫਰਕ ਸੂਬਿਆਂ ਤੋਂ ਕੇਂਦਰ ਨੂੰ ਅੰਕੜੇ ਮਿਲਣ 'ਚ ਦੇਰੀ ਦਾ ਕਾਰਨ ਰਹਿੰਦਾ ਹੈ। ਉਥੇ ਕਈ ਏਜੰਸੀਆਂ ਸਿੱਧਾ ਸੂਬਾ ਸਰਕਾਰਾਂ ਤੋਂ ਅੰਕੜਾ ਹਾਸਲ ਕਰਦੀਆਂ ਹਨ।

ਸੂਬਾ ਸਰਕਾਰਾਂ ਤੋਂ ਮਿਲੇ ਅੰਕੜਿਆਂ ਮੁਤਾਬਕ ਸ਼ੁੱਕਰਵਾਰ ਨੂੰ 46 ਲੋਕਾਂ ਦੀ ਮੌਤ ਹੋਈ ਹੈ। ਇਨ੍ਹਾਂ ਵਿਚੋਂ ਮਹਾਰਾਸ਼ਟਰ 'ਚ 18, ਗੁਜਰਾਤ 'ਚ 15, ਰਾਜਸਥਾਨ 'ਚ ਚਾਰ, ਮੱਧ ਪ੍ਰਦੇਸ਼ ਤੇ ਬੰਗਾਲ 'ਚ ਤਿੰਨ-ਤਿੰਨ, ਤਾਮਿਲਨਾਡੂ 'ਚ ਦੋ ਤੇ ਕੇਰਲ 'ਚ ਇਕ ਮੌਤ ਸ਼ਾਮਲ ਹੈ। ਕੇਰਲ 'ਚ ਤਾਂ ਚਾਰ ਮਹੀਨੇ ਦੀ ਇਕ ਬੱਚੀ ਦੀ ਮੌਤ ਹੋਈ ਹੈ। ਦੇਸ਼ 'ਚ ਹੁਣ ਤਕ ਇਸ ਮਹਾਮਾਰੀ ਨਾਲ 767 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਸ਼ੁੱਕਰਵਾਰ ਨੂੰ 987 ਨਵੇਂ ਮਾਮਲੇ ਸਾਹਮਣੇ ਆਏ ਹਨ ਤੇ ਇਨਫੈਕਟਿਡਾਂ ਦਾ ਅੰਕੜਾ 24,116 'ਤੇ ਪੁੱਜ ਗਿਆ ਹੈ।

ਮੁੰਬਈ 'ਚ ਹਾਲਾਤ ਬੇਹੱਦ ਚਿੰਤਾਜਨਕ,ਵੱਡੇ ਕਹਿਰ ਦਾ ਖਦਸਾ

ਮਹਾਰਾਸ਼ਟਰ 'ਚ ਹਾਲਾਤ ਤਾਂ ਖ਼ਰਾਬ ਹਨ ਹੀ ਮੁੰਬਈ 'ਚ ਹਾਲਾਤ ਚਿੰਤਾਜਨਕ ਬਣਦੇ ਜਾ ਰਹੇ ਹਨ। ਸੂਬੇ 'ਚ ਸ਼ੁੱਕਰਵਾਰ ਨੂੰ ਕੁਲ 394 ਨਵੇਂ ਮਾਮਲੇ ਸਾਹਮਣੇ ਆਏ, ਇਨ੍ਹਾਂ ਵਿਚੋਂ ਇਕੱਲੇ ਮੁੰਬਈ 'ਚ ਹੀ 357 ਮਾਮਲੇ ਸਨ। ਮੁੰਬਈ ਦੀ ਧਾਰਾਵੀ ਬਸਤੀ 'ਚ ਛੇ ਨਵੇਂ ਕੇਸ ਮਿਲੇ ਹਨ, ਜਦਕਿ ਨਾਸਿਕ 'ਚ ਦੋ ਲੋਕਾਂ ਦੀ ਮੌਤ ਹੋਈ ਹੈ ਤੇ ਇਕ ਹੀ ਪਰਿਵਾਰ ਦੇ ਛੇ ਲੋਕ ਇਨਫੈਕਟਿਡ ਪਾਏ ਗਏ ਹਨ। ਮਹਾਰਾਸ਼ਟਰ 'ਚ ਇਨਫੈਕਟਿਡਾਂ ਦੀ ਗਿਣਤੀ 6,817 ਹੋ ਗਈ ਹੈ, ਜਦਕਿ ਮੁੰਬਈ 'ਚ ਇਹ ਅੰਕੜਾ 4,589 'ਤੇ ਪੁੱਜ ਗਿਆ ਹੈ।

ਗੁਜਰਾਤ 'ਚ  ਮੌਤਾਂ ਦੀ ਗਿਣਤੀ ਹੋਈ 15 

ਗੁਜਰਾਤ 'ਚ ਸਥਿਤੀ ਖ਼ਰਾਬ ਹੋ ਰਹੀ ਹੈ। ਸੂਬੇ 'ਚ 191 ਨਵੇਂ ਮਾਮਲੇ ਮਿਲੇ ਹਨ ਤੇ 15 ਲੋਕਾਂ ਦੀ ਮੌਤ ਹੋਈ ਹੈ। ਸੂਬੇ 'ਚ ਇਨਫੈਕਟਿਡ ਲੋਕਾਂ ਦਾ ਅੰਕੜਾ 2,851 ਹੋ ਗਿਆ ਹੈ ਤੇ ਹੁਣ ਤਕ 127 ਲੋਕਾਂ ਦੀ ਜਾਨ ਵੀ ਜਾ ਚੁੱਕੀ ਹੈ। ਰਾਜਧਾਨੀ ਦਿੱਲੀ 'ਚ ਵੀ ਇਨਫੈਕਟਿਡ ਲੋਕਾਂ ਦਾ ਅੰਕੜਾ 2,514 ਹੋ ਗਿਆ ਹੈ। ਸ਼ੁੱਕਰਵਾਰ ਨੂੰ 138 ਨਵੇਂ ਮਾਮਲੇ ਸਾਹਮਣੇ ਆਏ।

ਉੱਤਰ ਪ੍ਰਦੇਸ਼ 'ਚ 94 ਨਵੇਂ ਮਾਮਲੇ ਆਏ ਸਾਮਣੇ

ਸ਼ੁੱਕਰਵਾਰ ਨੂੰ ਉੱਤਰ ਪ੍ਰਦੇਸ਼ 'ਚ 94 ਨਵੇਂ ਮਾਮਲੇ ਸਾਹਮਣੇ ਆਏ ਤੇ ਇਨਫੈਕਟਿਡਾਂ ਦਾ ਅੰਕੜਾ 1,604 ਹੋ ਗਿਆ। ਪਿਛਲੇ ਕੁਝ ਦਿਨਾਂ ਤੋਂ ਸੂਬੇ 'ਚ ਨਵੇਂ ਮਾਮਲਿਆਂ 'ਚ ਤੇਜ਼ੀ ਨਾਲ ਵਾਧਾ ਹੋਇਆ ਹੈ। ਬਿਹਾਰ 'ਚ ਵੀ 44 ਨਵੇਂ ਮਾਮਲੇ ਮਿਲੇ ਹਨ ਤੇ ਅੰਕੜਾ 214 ਹੋ ਗਿਆ ਹੈ। ਨਵੇਂ ਮਾਮਲਿਆਂ 'ਚ ਸਭ ਤੋਂ ਜ਼ਿਆਦਾ ਮੁੰਗੇਰ ਜ਼ਿਲ੍ਹੇ 'ਚ ਹੀ 21 ਮਾਮਲੇ ਸ਼ਾਮਲ ਹਨ। ਝਾਰਖੰਡ 'ਚ ਇਕ ਨਵਾਂ ਕੇਸ ਮਿਲਿਆ ਹੈ ਤੇ ਅੰਕੜਾ 58 ਹੋ ਗਿਆ ਹੈ।

ਮੱਧ ਪ੍ਰਦੇਸ਼ 'ਚ ਵੀ ਹਲਾਤ ਖ਼ਰਾਬ

ਮੱਧ ਪ੍ਰਦੇਸ਼ 'ਚ ਹਾਲਾਤ ਖ਼ਰਾਬ ਹੁੰਦੇ ਜਾ ਰਹੇ ਹਨ। ਉਥੇ 55 ਨਵੇਂ ਮਾਮਲੇ ਤਾਂ ਮਿਲੇ ਹੀ ਤਿੰਨ ਲੋਕਾਂ ਦੀ ਮੌਤ ਵੀ ਹੋਈ ਹੈ। ਹੁਣ ਤਕ ਸੂਬੇ 'ਚ ਕੋਰੋਨਾ ਨਾਲ 92 ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ ਤੇ 1,832 ਇਨਫੈਕਟਿਡ ਹੋਏ ਹਨ।

ਖੁਸ਼ਖਬਰੀ,ਕੇਰਲ 'ਚ ਹਾਲਾਤ ਕਾਬੂ 'ਚ

ਦੱਖਣੀ ਭਾਰਤ ਦੇ ਸੂਬਿਆਂ 'ਚ ਕੇਰਲ ਦੀ ਸਥਿਤੀ ਕਾਬੂ 'ਚ ਨਜ਼ਰ ਆ ਰਹੀ ਹੈ। ਪਿਛਲੇ ਦੋ ਤਿੰਨ ਦਿਨ ਬਾਅਦ ਫਿਰ ਨਵੇਂ ਮਾਮਲਿਆਂ 'ਚ ਕਮੀ ਆਈ ਹੈ। ਸ਼ੁੱਕਰਵਾਰ ਨੂੰ ਤਿੰਨ ਨਵੇਂ ਮਾਮਲੇ ਹਨ ਪਰ ਚਾਰ ਮਹੀਨਿਆਂ ਦੀ ਇਕ ਬੱਚੀ ਦੀ ਜਾਨ ਚਲੀ ਗਈ ਹੈ। ਸੂਬੇ 'ਚ ਹੁਣ ਤਕ ਮਿਲੇ ਇਨਫੈਕਟਿਡਾਂ ਦੀ ਗਿਣਤੀ 450 ਹੋ ਗਈ ਹੈ ਪਰ ਸਰਗਰਮ ਮਾਮਲੇ ਸਿਰਫ 116 ਹੀ ਰਹਿ ਗਏ ਹਨ, ਬਾਕੀ ਮਰੀਜ਼ ਸਿਹਤਮੰਤ ਹੋ ਕੇ ਆਪਣੇ ਘਰ ਜਾ ਚੁੱਕੇ ਹਨ। ਤਿੰਨ ਲੋਕਾਂ ਦੀ ਹੁਣ ਤਕ ਮੌਤ ਹੋਈ ਹੈ। ਕਰਨਾਟਕ 'ਚ 27 ਨਵੇਂ ਕੇਸ ਮਿਲੇ ਹਨ ਤੇ ਇਨਫੈਕਟਿਡ ਲੋਕਾਂ ਦੀ ਗਿਣਤੀ 474 ਹੋ ਗਈ ਹੈ। ਤਾਮਿਲਨਾਡੂ 'ਚ 72 ਨਵੇਂ ਮਾਮਲੇ ਸਾਹਮਣੇ ਆਏ ਹਨ ਤੇ ਕੁਲ ਮਰੀਜ਼ਾਂ ਦਾ ਅੰਕੜਾ 1,755 ਹੋ ਗਿਆ ਹੈ।

ਬੰਗਾਲ 'ਚ  ਗਿਣਤੀ 500 ਤੋਂ ਪਾਰ

ਬੰਗਾਲ 'ਚ ਕੋਰੋਨਾ ਮਰੀਜ਼ਾਂ ਦੀ ਗਿਣਤੀ 500 ਤੋਂ ਪਾਰ ਹੋ ਗਈ ਹੈ। ਸ਼ੁੱਕਰਵਾਰ ਨੂੰ 53 ਨਵੇਂ ਕੇਸ ਮਿਲੇ ਤੇ ਇਨਫੈਕਟਿਡਾਂ ਦੀ ਗਿਣਤੀ 514 ਹੋ ਗਈ ਹੈ। ਓਡੀਸ਼ਾ 'ਚ ਪੰਜ ਨਵੇਂ ਕੇਸ ਪਾਏ ਗਏ ਹਨ ਤੇ 94 ਲੋਕ ਇਨਫੈਕਟਿਡ ਹੋ ਗਏ ਹਨ।

ਰਾਜਸਥਾਨ ਚ  ਗਿਣਤੀ  ਪਹੁੰਚੀ 2000 ਤੇ

ਰਾਜਸਥਾਨ 'ਚ ਹੋਰ 44 ਮਾਮਲੇ ਹਨ ਤੇ ਇਨਫੈਕਟਿਡਾਂ ਦੀ ਗਿਣਤੀ 2008 ਹੋ ਗਈ ਹੈ। ਇਥੇ ਚਾਰ ਲੋਕਾਂ ਦੀ ਜਾਨ ਵੀ ਗਈ ਹੈ ਤੇ ਮਰਨ ਵਾਲਿਆਂ ਦੀ ਗਿਣਤੀ ਵੀ 32 'ਤੇ ਪੁੱਜ ਗਈ ਹੈ। ਜੰਮੂ-ਕਸ਼ਮੀਰ 'ਚ ਵੀ 20 ਨਵੇਂ ਮਾਮਲੇ ਮਿਲੇ ਹਨ ਤੇ ਇਹ ਸਾਰੇ ਮਾਮਲੇ ਕਸ਼ਮੀਰ 'ਚ ਸਾਹਮਣੇ ਆਏ ਹਨ। ਸੂਬੇ 'ਚ ਹੁਣ ਤਕ 554 ਇਨਫੈਕਟਿਡ ਮਿਲ ਚੁੱਕੇ ਹਨ। ਪੰਜਾਬ 'ਚ 11 ਨਵੇਂ ਕੇਸ ਸਾਹਮਣੇ ਆਏ ਹਨ ਤੇ ਕੁਲ 298 ਇਨਫੈਕਟਿਡ ਹੋਏ ਗਏ ਹਨ। ਹਰਿਆਣੇ 'ਚ ਪੰਜ ਨਵੇਂ ਮਾਮਲੇ ਸਾਹਮਣੇ ਆਏ ਹਨ ਤੇ ਇਨਫੈਕਟਿਡਾਂ ਦੀ ਗਿਣਤੀ 275 ਹੋ ਗਈ ਹੈ।

ਕੈਂਸਰ ਪੀੜਤਾਂ ਨੂੰ ਦਾਨ ਕਰੇਗੀ ਵਾਲ

ਨਵੀਂ ਦਿੱਲੀ,ਅਪ੍ਰੈਲ 2020 -(ਏਜੰਸੀ)-

 ਕਿਸੇ ਵੀ ਅਦਾਕਾਰ ਲਈ ਉਸਦਾ ਲੁਕ ਸਭ ਤੋਂ ਵੱਧ ਮਹੱਤਵ ਰੱਖਦਾ ਹੈ ਪਰ ਟੀਵੀ ਇੰਡਸਟਰੀ ਵਿਚ ਇਕ ਅਜਿਹੀ ਅਦਾਕਾਰਾ ਹੈ, ਜਿਸ ਦੇ ਲਈ ਉਸ ਦਾ ਲੁਕ ਉਸਨੂੰ ਮੈਟਰ ਨਹੀਂ ਕਰਦਾ ਬਲਕਿ ਸਿਰਫ ਐਕਟਿੰਗ ਮੈਟਰ ਕਰਦੀ ਹੈ। ਇਸੇ ਵਜ੍ਹਾ ਨਾਲ ਅਦਾਕਾਰਾ ਨੇ ਲਾਕਡਾਊਨ ਦੌਰਾਨ ਅਜਿਹਾ ਕਦਮ ਚੁੱਕਿਆ ਹੈ, ਜੋ ਚੁੱਕਣਾ ਕਿਸੇ ਹੋਰ ਔਰਤ ਜਾਂ ਅਦਾਕਾਰ ਲਈ ਕਾਫੀ ਵੱਡੀ ਗੱਲ ਹੋਵੇਗੀ। ਅਸੀਂ ਗੱਲ਼ ਕਰ ਰਹੇ ਹਾਂ ਅਦਾਕਾਰਾ ਜਯਾ ਭੱਟਾਚਾਰੀਆ ਦੀ।

ਜਯਾ ਭੱਟਾਚਾਰੀਆ ਉਨ੍ਹਾਂ ਕਾਲਾਕਾਰਾਂ ਵਿਚੋਂ ਇਕ ਹੈ ਜੋ ਕੋਰੋਨਾ ਵਾਇਰਸ ਖਿਲਾਫ ਲੋਕਾਂ ਦੀ ਮਦਦ ਕਰਨ ਲਈ ਜ਼ਮੀਨ ਉੱਤੇ ਉੱਤਰੀ ਹੋਈ ਹੈ। ਜਯਾ ਲੋਕਾਂ ਦੇ ਵਿਚਕਾਰ ਜਾ ਕੇ ਉਨ੍ਹਾਂ ਨੂੰ ਖਾਣਾ ਦੇ ਰਹੀ ਹੈ ਅਤੇ ਉਨ੍ਹਾਂ ਦੀ ਹੈਲਪ ਕਰ ਰਹੀ ਹੈ ਪਰ ਇਸ ਸਭ ਦੌਰਾਨ ਇਕ ਚੀਜ਼ ਹੈ ਜੋ ਅਦਾਕਾਰਾ ਨੂੰ ਪ੍ਰੇਸ਼ਾਨ ਕਰ ਰਹੀ ਹੈ, ਉਹ ਹਨ ਉਸਦੇ ਆਪਣੇ ਵਾਲ। ਇਨ੍ਹਾਂ ਸਾਰੇ ਕੰਮਾਂ ਦੇ ਵਿਚਕਾਰ ਜਯਾ ਆਪਣੇ ਵਾਲਾਂ ਤੋਂ ਬਹੁਤ ਪ੍ਰੇਸ਼ਾਨ ਨਜ਼ਰ ਆ ਰਹੀ ਹੈ। ਇਸੇ ਕਾਰਨ ਉਸਨੇ ਆਪਣਾ ਸਿਰ ਮੁੰਡਵਾ ਲਿਆ ਹੈ। ਆਪਣਾ ਵਾਲਾਂ ਤੋਂ ਜਯਾ ਇਨ੍ਹੀਂ ਪ੍ਰੇਸ਼ਾਨ ਹੋ ਗਈ ਕਿ ਉਨ੍ਹਾਂ ਨੇ ਆਪਣੇ ਸਾਰੇ ਵਾਲ ਉਤਰਵਾ ਦਿੱਤੇ ਅਤੇ ਉਹ ਗੰਜ਼ੀ ਹੋ ਗਈ। 

ਨਵੀਂ ਦਿੱਲੀ ,ਅਪ੍ਰੈਲ 2020 -(ਏਜੰਸੀ)- ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਹਰਦੀਪ ਸਿੰਘ ਪੁਰੀ ਦੇ ਟਵੀਟ 'ਤੇ ਧਿਆਨ ਨਾ ਦਿੰਦੇ ਹੋਏ ਏਅਰਲਾਈਨਾਂ ਚਾਰ ਮਈ ਤੋਂ ਚੋਣਵੀਆਂ ਉਡਾਣਾਂ ਦੀ ਬੁਕਿੰਗ ਕਰਨ ਵਿਚ ਲੱਗੀਆਂ ਹੋਈਆਂ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਦੋਂ ਤਕ ਉਨ੍ਹਾਂ ਨੂੰ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਵੱਲੋਂ ਲਿਖਤੀ ਆਦੇਸ਼ ਨਹੀਂ ਮਿਲਦਾ ਉਹ ਬੁਕਿੰਗ ਬੰਦ ਨਹੀਂ ਕਰਨਗੀਆਂ। ਹਾਲਾਂਕਿ, ਪੁਰੀ ਦੀ ਸਲਾਹ ਦੇ ਇਕ ਦਿਨ ਪਿੱਛੋਂ ਏਅਰ ਇੰਡੀਆ ਨੇ ਸਾਰੀਆਂ ਉਡਾਣਾਂ ਲਈ ਆਪਣੀ ਬੁਕਿੰਗ ਰੋਕ ਦਿੱਤੀ ਹੈ। ਏਅਰ ਇੰਡੀਆ ਦੇ ਇਕ ਅਧਿਕਾਰੀ ਨੇ ਐੇਤਵਾਰ ਨੂੰ ਕਿਹਾ ਕਿ ਜਿਨ੍ਹਾਂ ਯਾਤਰੀਆਂ ਨੇ ਟਿਕਟ ਕਟਵਾ ਰੱਖਿਆ ਹੈ ਉਨ੍ਹਾਂ ਨੂੰ ਭਵਿੱਖ ਦੀ ਯਾਤਰਾ ਲਈ ਕ੍ਰੈਡਿਟ ਵਾਊਚਰ ਮਿਲੇਗਾ।

ਐਤਵਾਰ ਨੂੰ ਏਅਰ ਇੰਡੀਆ ਵੱਲੋਂ ਚਾਰ ਮਈ ਤੋਂ ਘਰੇਲੂ ਉਡਾਣਾਂ ਅਤੇ ਇਕ ਜੂਨ ਤੋਂ ਕੌਮਾਂਤਰੀ ਉਡਾਣਾਂ ਦੀ ਬੁਕਿੰਗ ਦੇ ਐਲਾਨ ਪਿੱਛੋਂ ਨਿੱਜੀ ਏਅਰਲਾਈਨਾਂ ਨੇ ਵੀ ਘਰੇਲੂ ਉਡਾਣਾਂ ਦੀ ਬੁਕਿੰਗ ਆਰੰਭ ਕਰ ਦਿੱਤੀ ਹੈ। ਪੁਰੀ ਨੇ ਸ਼ਨਿਚਰਵਾਰ ਦੇਰ ਸ਼ਾਮ ਹੀ ਟਵੀਟ ਕਰ ਕੇ ਏਅਰਲਾਈਨਾਂ ਨੂੰ ਅਜਿਹਾ ਨਾ ਕਰਨ ਦੀ ਸਲਾਹ ਦਿੱਤੀ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜਦੋਂ ਤਕ ਸਰਕਾਰ ਉਡਾਣਾਂ ਸ਼ੁਰੂ ਕਰਨ ਦੇ ਬਾਰੇ ਵਿਚ ਕੋਈ ਫ਼ੈਸਲਾ ਨਹੀਂ ਲੈ ਲੈਂਦੀ ਤਦ ਤਕ ਏਅਰਲਾਈਨਾਂ ਨੂੰ ਕਿਸੇ ਤਰ੍ਹਾਂ ਦੀ ਬੁਕਿੰਗ ਸ਼ੁਰੂ ਨਹੀਂ ਕਰਨੀ ਚਾਹੀਦੀ।

ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਦੇ ਟਵੀਟ ਦੇ ਬਾਵਜੂਦ ਚਾਰ ਮਈ ਤੋਂ ਬੁਕਿੰਗ ਸ਼ੁਰੂ ਕਰਨ ਬਾਰੇ ਪੁੱਛੇ ਜਾਣ 'ਤੇ ਐਤਵਾਰ ਨੂੰ ਵਿਸਤਾਰਾ ਅਤੇ ਏਅਰ ਏਸ਼ੀਆ ਇੰਡੀਆ ਨੇ ਕਿਹਾ ਕਿ ਹੁਣ ਤਕ ਉਨ੍ਹਾਂ ਨੂੰ ਸਰਕਾਰ ਵੱਲੋਂ ਬੁਕਿੰਗ ਨਾ ਕਰਨ ਬਾਰੇ ਕੋਈ ਲਿਖਤੀ ਆਦੇਸ਼ ਪ੍ਰਰਾਪਤ ਨਹੀਂ ਹੋਇਆ ਹੈ। ਵਿਸਤਾਰਾ ਦੇ ਬੁਲਾਰੇ ਨੇ ਕਿਹਾ ਕਿ ਇਸ ਸਬੰਧ ਵਿਚ ਅਸੀਂ ਮੰਤਰਾਲੇ ਦੇ ਨੋਟਿਸ ਦਾ ਇੰਤਜ਼ਾਰ ਕਰਾਂਗੇ। ਅਸੀਂ ਤਿੰਨ ਮਈ ਤਕ ਉਡਾਣਾਂ ਅਤੇ ਬੁਕਿੰਗ ਬੰਦ ਕਰ ਰੱਖੀ ਹੈ ਪ੍ਰੰਤੂ ਚਾਰ ਮਈ ਅਤੇ ਉਸ ਪਿੱਛੋਂ ਦੀਆਂ ਤਰੀਕਾਂ ਲਈ ਬੁਕਿੰਗ ਸਵੀਕਾਰ ਕਰ ਰਹੇ ਹਾਂ। ਜਿਵੇਂ ਹੀ ਮੰਤਰਾਲੇ ਵੱਲੋਂ ਸਥਿਤੀ ਸਪੱਸ਼ਟ ਕਰ ਦਿੱਤੀ ਜਾਵੇਗੀ ਅਸੀਂ ਬੁਕਿੰਗ ਬੰਦ ਕਰ ਦਿਆਂਗੇ।

ਏਅਰ ਏਸ਼ੀਆ ਇੰਡੀਆ ਦੇ ਬੁਲਾਰੇ ਨੇ ਵੀ ਕੁਝ ਇਸੇ ਤਰ੍ਹਾਂ ਦੀ ਪ੍ਰਤੀਕਿਰਿਆ ਦਿੱਤੀ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਤਿੰਨ ਮਈ ਤਕ ਲਾਕਡਾਊਨ ਐਲਾਨਿਆ ਗਿਆ ਹੈ। ਲਿਹਾਜ਼ਾ ਅਸੀਂ ਚਾਰ ਮਈ ਤੋਂ ਬੁਕਿੰਗ ਖੋਲ੍ਹ ਦਿੱਤੀ ਹੈ। ਏਅਰ ਏਸ਼ੀਆ ਇੰਡੀਆ ਦੇ ਬੁਲਾਰੇ ਦਾ ਕਹਿਣਾ ਸੀ ਕਿ ਉਡਾਣਾਂ ਦੀ ਬੁਕਿੰਗ ਇਸ ਲਈ ਸ਼ੁਰੂ ਕੀਤੀ ਗਈ ਹੈ ਕਿਉਂਕਿ ਹਜ਼ਾਰਾਂ ਯਾਤਰੀਆਂ ਨੂੰ ਪਹਿਲੇ ਤੋਂ ਯਾਤਰਾ ਦੀ ਤਿਆਰੀ ਕਰਨੀ ਪੈਂਦੀ ਹੈ। ਇਸ ਨਾਲ ਉਨ੍ਹਾਂ ਨੂੰ ਸਸਤੇ ਕਿਰਾਇਆਂ ਦਾ ਫ਼ਾਇਦਾ ਉਠਾਉਣ ਵਿਚ ਸਹੂਲਤ ਹੁੰਦੀ ਹੈ। ਸਾਨੂੰ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਜਾਂ ਡੀਜੀਸੀਏ ਵੱਲੋਂ ਬੁਕਿੰਗ ਨਾ ਕਰਨ ਦੇ ਬਾਰੇ ਵਿਚ ਕੋਈ ਰਸਮੀ ਨਿਰਦੇਸ਼ ਪ੍ਰਰਾਪਤ ਨਹੀਂ ਹੋਇਆ ਹੈ। ਵੈਸੇ ਵੀ ਜੇ ਲਾਕਡਾਊਨ ਦੀ ਮਿਆਦ ਵਧਾਈ ਜਾਂਦੀ ਹੈ ਤਾਂ ਉਸ ਦਿਸ਼ਾ ਵਿਚ ਲੋਕਾਂ ਕੋਲ ਆਪਣੀ ਯਾਤਰਾ ਦੀ ਨਵੀਂ ਤਰੀਕ ਤੈਅ ਕਰਨ ਦਾ ਬਦਲ ਹਮੇਸ਼ਾ ਮੌਜੂਦ ਰਹੇਗਾ।

ਇਸ ਤੋਂ ਪਹਿਲੇ ਅਨੇਕਾਂ ਯਾਤਰੀਆਂ ਨੇ ਸੋਸ਼ਲ ਮੀਡੀਆ ਦੇ ਮਾਧਿਅਮ ਰਾਹੀਂ ਸਰਕਾਰ ਨੂੰ ਸ਼ਿਕਾਇਤ ਕੀਤੀ ਸੀ ਕਿ ਭਾਰਤੀ ਏਅਰਲਾਈਨਾਂ ਲਾਕਡਾਊਨ ਕਾਰਨ ਰੱਦ ਹੋਈਆਂ ਉਡਾਣਾਂ ਦਾ ਰਿਫੰਡ ਦੇਣ ਦੀ ਥਾਂ ਉਨ੍ਹਾਂ ਨੂੰ ਅੱਗੇ ਦੀ ਤਰੀਕ ਵਿਚ ਯਾਤਰਾ ਕਰਨ ਲਈ ਮਜਬੂਰ ਕਰ ਰਹੀਆਂ ਹਨ। ਇਨ੍ਹਾਂ ਸ਼ਿਕਾਇਤਾਂ ਦੇ ਮੱਦੇਨਜ਼ਰ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ 16 ਅਪ੍ਰੈਲ ਨੂੰ ਏਅਰਲਾਈਨਾਂ ਨੂੰ ਨਿਰਦੇਸ਼ ਦਿੱਤਾ ਸੀ ਕਿ ਉਹ ਰਿਫੰਡ ਦੇ ਇੱਛੁਕ ਯਾਤਰੀਆਂ ਨੂੰ 25 ਅਪ੍ਰੈਲ ਤੋਂ ਤਿੰਨ ਮਈ ਤਕ ਦੋ ਪੜਾਵਾਂ ਵਿਚ ਹੋਏ ਲਾਕਡਾਊਨ ਦੌਰਾਨ ਕੀਤੀ ਗਈ ਸਾਰੀ ਬੁਕਿੰਗ ਦਾ ਪੂਰਾ ਪੈਸਾ ਕੈਂਸਲੇਸ਼ਨ ਚਾਰਜ ਕੱਟੇ ਬਿਨਾਂ ਵਾਪਸ ਕਰਨ।

ਭਾਰਤ 'ਚ ਕੋਰੋਨਾ ਵਾਇਰਸ (COVID-19) ਨਾਲ 507 ਲੋਕਾਂ ਦੀ ਮੌਤ

ਨਵੀਂ ਦਿੱਲੀ,ਅਪ੍ਰੈਲ 2020 (ਏਜੰਸੀ)

  ਉੱਤਰਾਖੰਡ 'ਚ ਕੁੱਲ ਕੋਰੋਨਾ ਪਾਜ਼ੇਟਿਵ ਮਾਮਲਿਆਂ ਦੀ ਗਿਣਤੀ ਵਧ ਕੇ 42 ਤਕ ਪਹੁੰਚਣ ਤੋਂ ਬਾਅਦ ਹਰਿਦੁਆਰ ਤੇ ਨੈਨੀਤਾਲ ਨੂੰ ਰੈੱਡ ਜ਼ੋਨ ਐਲਾਨ ਦਿੱਤਾ ਗਿਆ। ਵਧੀਕ ਸਕੱਤਰ (ਸਿਹਤ) ਯੁਗਲ ਕਿਸ਼ੋਰ ਪੰਤ ਅਨੁਸਾਰ, ਸੂਬੇ 'ਚ 80 ਫ਼ੀਸਦੀ ਮਾਮਲੇ ਦੇਹਰਾਦੂਨ, ਹਰਿਦੁਆਰ ਤੇ ਨੈਨੀਤਾਲ ਦੇ ਹਨ। ਸਿਹਤ ਮੰਤਰਾਲੇ ਵੱਲੋਂ ਜਾਰੀ ਤਾਜ਼ਾ ਅੰਕੜਿਆਂ ਅਨੁਸਾਰ ਭਾਰਤ 'ਚ ਕੋਰੋਨਾ ਵਾਇਰਸ (COVID-19) ਨਾਲ 507 ਲੋਕਾਂ ਦੀ ਮੌਤ ਹੋ ਗਈ ਹੈ ਤੇ ਹੁਣ ਤਕ ਕੁੱਲ 15,712 ਮਾਮਲਿਆਂ ਦੀ ਪੁਸ਼ਟੀ ਹੋਈ ਹੈ। ਇਨ੍ਹਾਂ ਵਿਚੋਂ 2230 ਲੋਕ ਠੀਕ ਹੋ ਗਏ ਹਨ। 12,974 ਲੋਕਾਂ ਦਾ ਇਲਾਜ ਜਾਰੀ ਹੈ। ਹਰਿਦੁਆਰ ਤੇ ਨੈਨੀਤਾਲ ਨੂੰ ਰੈੱਡ ਜ਼ੋਨ ਐਲਾਨ ਦਿੱਤਾ ਗਿਆ ਹੈ।

 ਨਵੀਂ ਦਿੱਲੀ , ਅਪ੍ਰੈਲ 2020 -(ਏਜੰਸੀ)-

 ਕੋਰੋਨਾ ਵਿਰੁੱਧ ਲੜਾਈ 'ਚ ਦੁਨੀਆ ਦੇ ਦੂਜੇ ਦੇਸ਼ਾਂ ਤੋਂ ਭਾਰਤ ਹਰ ਮੋਰਚੇ 'ਤੇ ਅੱਗੇ ਹੈ। ਪ੍ਰਤੀ 10 ਲੱਖ ਦੀ ਅਬਾਦੀ 'ਤੇ ਕੋਰੋਨਾ ਦੇ ਮਰੀਜ਼ਾਂ ਦੀ ਗਿਣਤੀ ਵੀ ਇੱਥੇ ਪੱਛਮੀ ਦੇਸ਼ਾਂ ਤੋਂ ਕਾਫ਼ੀ ਘੱਟ ਹੈ। ਜੇ ਕੋਰੋਨਾ ਮਰੀਜ਼ਾਂ ਦੀ ਗਿਣਤੀ ਦੁਗਣੀ ਹੋਣ ਦਾ ਹਿਸਾਬ ਲਾਇਆ ਜਾਵੇ ਤਾਂ ਇਸ ਵਿਚ ਵੀ ਭਾਰਤ ਦੀ ਸਥਿਤੀ ਬਿਹਤਰ ਹੈ। ਇੱਥੇ ਮਰੀਜ਼ਾਂ ਦੀ ਗਿਣਤੀ ਦੁਗਣੀ ਹੋਣ 'ਚ ਪੱਛਮੀ ਦੇਸ਼ਾਂ ਤੋਂ ਜ਼ਿਆਦਾ ਵਕਤ ਲੱਗ ਰਿਹਾ ਹੈ। ਭਾਰਤ ਵਿਚ ਕੋਰੋਨਾ ਦੇ ਟੈਸਟ ਘੱਟ ਹੋਣ ਦਾ ਦੋਸ਼ ਭਾਵੇਂ ਹੀ ਲਾਇਆ ਜਾਂਦਾ ਹੋਵੇ ਪਰ ਅੰਕੜੇ ਦੱਸਦੇ ਹਨ ਕਿ ਭਾਰਤ ਵਿਚ 24 ਟੈਸਟ ਕਰਨ 'ਤੇ ਇਕ ਪਾਜ਼ੇਟਿਵ ਮਰੀਜ਼ ਮਿਲ ਰਿਹਾ ਹੈ ਜਦਕਿ ਅਮਰੀਕਾ ਵਿਚ ਹਰ ਪੰਜ ਟੈਸਟ 'ਚ ਇਕ ਪਾਜ਼ੇਟਿਵ ਮਰੀਜ਼ ਮਿਲ ਰਿਹਾ ਹੈ।

ਇੰਡੀਅਨ ਕੌਂਸਲ ਆਫ ਮੈਡੀਕਲ ਰਿਸਰਚ (ਆਈਸੀਐੱਮਆਰ) ਦੇ ਡਾਕਟਰ ਰਮਨ ਗੰਗਖੇੜਕਰ ਅਨੁਸਾਰ ਦੁਨੀਆ ਵਿਚ ਸਭ ਤੋਂ ਬਿਹਤਰ ਟੈਸਟਿੰਗ ਕਰਨ ਵਾਲੇ ਦੇਸ਼ਾਂ ਤੋਂ ਵੀ ਭਾਰਤ ਬਹੁਤ ਅੱਗੇ ਹੈ। ਉਨ੍ਹਾਂ ਕਿਹਾ ਕਿ ਟੈਸਟਿੰਗ ਦੇ ਮਾਮਲੇ ਵਿਚ ਜਾਪਾਨ ਦੀ ਮਿਸਾਲ ਸਭ ਤੋਂ ਜ਼ਿਆਦਾ ਦਿੱਤੀ ਜਾ ਰਹੀ ਹੈ ਪਰ ਸੱਚਾਈ ਇਹ ਹੈ ਕਿ ਜਾਪਾਨ ਇਕ ਮਰੀਜ਼ ਲੱਭਣ ਲਈ 11.7 ਟੈਸਟ ਕਰਦਾ ਹੈ। ਇਸੇ ਤਰ੍ਹਾਂ ਇਕ ਮਰੀਜ਼ ਲਈ ਇਟਲੀ ਔਸਤਨ 6.7 ਟੈਸਟ, ਅਮਰੀਕਾ 5.3 ਟੈਸਟ ਤੇ ਬਰਤਾਨੀਆ 3.4 ਟੈਸਟ ਕਰ ਰਿਹਾ ਹੈ। ਉਧਰ ਭਾਰਤ ਨੂੰ ਇਕ ਮਰੀਜ਼ ਲੱਭਣ ਲਈ ਔਸਤਨ 24 ਟੈਸਟ ਕਰਨੇ ਪੈ ਰਹੇ ਹਨ।

ਇਸ ਤਰ੍ਹਾਂ ਪ੍ਰਤੀ ਮਰੀਜ਼ਾਂ ਦੀ ਗਿਣਤੀ ਦੇ ਹਿਸਾਬ ਨਾਲ ਭਾਰਤ ਦੁਨੀਆ ਦੇ ਦੂਜੇ ਦੇਸ਼ਾਂ ਦੀ ਤੁਲਨਾ ਵਿਚ ਕਈ ਗੁਣਾ ਜ਼ਿਆਦਾ ਟੈਸਟ ਕਰ ਰਿਹਾ ਹੈ। ਡਾ. ਗੰਗਾਖੇੜਕਰ ਨੇ ਕਿਹਾ ਕਿ ਇਸ ਤੋਂ ਇਲਾਵਾ ਅਸੀਂ ਕੋਰੋਨਾ ਤੋਂ ਅਣਛੋਹੇ ਇਲਾਕਿਆਂ ਵਿਚ ਵੀ ਸਰਦੀ, ਖੰਘ, ਜ਼ੁਕਾਮ ਤੇ ਸਾਹ ਨਾਲ ਸਬੰਧਿਤ ਬਿਮਾਰੀਆਂ ਤੋਂ ਪੀੜਤ ਲੋਕਾਂ ਦਾ ਕੋਰੋਨਾ ਟੈਸਟ ਕਰ ਰਹੇ ਹਾਂ।

ਕੁਸ ਮੱਧਮ ਪੈ ਰਹੀ ਹੈ ਰਫ਼ਤਾਰ

ਸਿਹਤ ਮੰਤਰਾਲੇ ਦੇ ਅੰਕੜਿਆਂ ਮੁਤਾਬਕ 750 ਤੋਂ 1500 ਤੇ 1500 ਤੋਂ 3000 ਮਰੀਜ਼ਾਂ ਦੀ ਗਿਣਤੀ ਪੁੱਜਣ 'ਚ ਭਾਰਤ 'ਚ ਚਾਰ-ਚਾਰ ਦਿਨ ਲੱਗੇ ਸਨ। ਉਧਰ 3000 ਤੋਂ 6000 ਪੁੱਜਣ ਵਿਚ ਪੰਜ ਦਿਨ ਲੱਗੇ ਤੇ 6000 ਤੋਂ 12 ਹਜ਼ਾਰ ਪੁੱਜਣ 'ਚ ਛੇ ਦਿਨ ਲੱਗੇ। ਅਮਰੀਕਾ 'ਚ ਏਨੇ ਮਰੀਜ਼ ਹੋਣ ਤਕ ਉਨ੍ਹਾਂ ਦੀ ਗਿਣਤੀ ਹਰ ਦੂਜੇ ਦਿਨ ਦੁਗਣੀ ਹੋ ਰਹੀ ਸੀ। ਵਿਕਸਤ ਦੇਸ਼ਾਂ ਵਿਚ ਸਭ ਤੋਂ ਬਿਹਤਰ ਪ੍ਰਦਰਸ਼ਨ ਕੈਨੇਡਾ ਦਾ ਰਿਹਾ ਪਰ ਉੱਥੇ ਵੀ ਪੰਜ ਦਿਨ ਵਿਚ ਮਰੀਜ਼ਾਂ ਦੀ ਗਿਣਤੀ ਛੇ ਹਜ਼ਾਰ ਤੋਂ 12 ਹਜ਼ਾਰ ਹੋ ਗਈ ਸੀ।

ਹਰਿਆਣਾ 'ਚ 15 ਨਵੇਂ ਮਾਮਲੇ ਆਏ ਸਾਹਮਣੇ

ਚੰਡੀਗੜ੍ਹ ,ਅਪ੍ਰੈਲ2 2020 -(ਏਜੰਸੀ)-

ਹਰਿਆਣਾ 'ਚ ਕੋਰੋਨਾ ਨਾਲ ਜੰਗ ਜਾਰੀ ਹੈ। ਵੀਰਵਾਰ ਨੂੰ ਰਾਜ 'ਚ 15 ਹੋਰ ਨਵੇਂ ਮਾਮਲੇ ਮਿਲੇ, ਜਦੋਂਕਿ ਅੱਠ ਮਰੀਜ਼ ਠੀਕ ਹੋ ਕੇ ਆਪਣੇ ਘਰਾਂ ਨੂੰ ਪਰਤ ਗਏ ਹਨ। ਪੰਚਕੂਲਾ 'ਚ ਇਕ ਹੀ ਪਰਿਵਾਰ ਦੇ ਅੱਠ ਹੋਰ ਜੀਅ ਕੋਰੋਨਾ ਦੀ ਲਪੇਟ 'ਚ ਆ ਗਏ। ਨੂੰਹ 'ਚ ਸੱਤ ਨਵੇਂ ਇਨਫੈਕਟਡ ਮਾਮਲੇ ਸਾਹਮਣੇ ਆਏ ਹਨ। ਫਰੀਦਾਬਾਦ ਅਤੇ ਪਲਵਲ 'ਚ ਤਿੰਨ-ਤਿੰਨ ਅਤੇ ਭਾਵਨੀ ਅਤੇ ਨੁੰਹ 'ਚ ਇਕ-ਇਕ ਮਰੀਜ਼ ਠੀਕ ਹੋਏ ਹਨ।

ਰਾਜ ਸਰਕਾਰ ਨੇ ਪਹਿਲੀ ਵਾਰ ਇਟਲੀ ਦੇ ਉਨ੍ਹਾਂ 14 ਵਿਅਕਤੀਆਂ ਨੂੰ ਵੀ ਆਪਣੀ ਸੂਚੀ 'ਚ ਸ਼ਾਮਲ ਕੀਤਾ ਹੈ, ਜਿਨ੍ਹਾਂ ਨੂੰ ਗੁਰੂਗ੍ਰਾਮ ਦੇ ਮੇਦਾਂਤਾ ਹਸਪਤਾਲ 'ਚ ਦਾਖ਼ਲ ਕੀਤਾ ਗਿਆ ਸੀ। ਇਨ੍ਹਾਂ 'ਚੋਂ 13 ਠੀਕ ਹੋ ਗਏ ਸਨ। ਹਾਲਾਂਕਿ ਇਨ੍ਹਾਂ 'ਚੋਂ ਇਕ ਵਿਦੇਸ਼ੀ ਦੀ ਬਾਅਦ 'ਚ ਕਿਸੇ ਹੋਰ ਬਿਮਾਰੀ ਨਾਲ ਮੌਤ ਹੋ ਗਈ ਸੀ। ਇਕ ਵਿਅਕਤੀ ਦੀ ਰਿਪੋਰਟ ਨੈਗੇਟਿਵ ਆਈ ਸੀ।

ਰਾਜ 'ਚ ਹੁਣ ਤਕ ਕੋਰੋਨਾ ਦ ਕੁੱਲ 219 ਮਾਮਲੇ ਆਏ ਹਨ, ਜਿਨ੍ਹਾਂ 'ਚੋਂ 64 ਠੀਕ ਹੋ ਕੇ ਆਪਣੇ ਘਰਾਂ ਨੂੰ ਚਲੇ ਗਏ ਹਨ। ਫਿਲਹਾਲ 151 ਮਰੀਜ਼ ਹਸਪਤਾਲਾਂ 'ਚ ਦਾਖ਼ਲ ਹਨ, ਜਿਨ੍ਹਾਂ 'ਚ 122 ਤਬਲੀਗੀ ਜਮਾਤ ਦੇ ਹਨ। 49 ਮਰੀਜ਼ ਨੂੰਹ 'ਚ, ਫਰੀਦਾਬਾਦ 'ਚ 22, ਪਲਵਲ 'ਚ 26, ਗੁਰੂਗ੍ਰਾਮ 'ਚ 15 ਅਤੇ ਪੰਚਕੂਲਾ 'ਚ 12 ਮਰੀਜ਼ ਹਨ। ਇਸ ਤੋਂ ਇਲਾਵਾ ਅੰਬਾਲਾ 'ਚ ਪੰਜ, ਸੋਨੀਪਤ ਤੇ ਯਮੁਨਾਨਗਰ 'ਚ ਤਿੰਨ-ਤਿੰਨ, ਜੀਂਦ, ਕਰਨਾਲ, ਕੈਥਲ, ਕੁਰੂਕਸ਼ੇਤਰ ਅਤੇ ਸਿਰਸਾ 'ਚ ਦੋ-ਦੋ ਅਤੇ ਹਿਸਾਰ ਤੇ ਪਾਨੀਪਤ 'ਚ ਇਕ-ਇਕ ਮਰੀਜ਼ ਹੈ। ਹੁਣ ਤਕ ਗੁਰੂਗ੍ਰਾਮ 'ਚ 17, ਕਰਨਾਲ 'ਚ ਤਿੰਨ, ਪਲਵਲ ਤੇ ਪਾਨੀਪਤ 'ਚ ਚਾਰ-ਚਾਰ, ਪੰਚਕੂਲਾ, ਸਿਰਸਾ, ਅੰਬਾਲਾ ਤੇ ਭਿਵਾਨੀ 'ਚ ਦੋ-ਦੋ ਅਤੇ ਫਤੇਹਬਾਦ, ਹਿਸਾਰ,ਨੂੰਹ ਤੇ ਸੋਨੀਪਤ 'ਚ ਇਕ-ਇਕ ਮਰੀਜ਼ ਠੀਕ ਹੋ ਕੇ ਘਰਾਂ ਨੂੰ ਚਲੇ ਗਏ ਹਨ।

ਪੁੱਡੂਚੇਰੀ, ਅਪ੍ਰੈਲ 2020 -(ਏਜੰਸੀ)-
ਕੈਂਸਰ ਪੀੜਤ ਆਪਣੀ ਪਤਨੀ ਨੂੰ ਨਾ ਗੁਆਉਣ ਦੀ ਇੱਛਾ ਰੱਖਣ ਵਾਲਾ 65 ਸਾਲਾ ਇਕ ਦਿਹਾੜੀਦਾਰ ਵਿਅਕਤੀ ਇਲਾਜ ਲਈ ਉਸ ਨੂੰ 130 ਕਿਲੋਮੀਟਰ ਦੂਰ ਸਾਈਕਲ ’ਤੇ ਬਿਠਾ ਕੇ ਇਕ ਮਸ਼ਹੂਰ ਹਸਪਤਾਲ ਜੇਆਈਪੀ ਐੱਮਈਆਰ ਲੈ ਕੇ ਪਹੁੰਚਿਆ। ਮਿਲੀ ਜਾਣਕਾਰੀ ਅਨੁਸਾਰ ਨੇੜਲੇ ਸੂਬੇ ਤਾਮਿਲਨਾਡੂ ਦੇ ਕਸਬਾ ਕੁੰਬਾਕੋਨਮ ਦਾ ਰਹਿਣ ਵਾਲਾ 65 ਸਾਲਾ ਅਰੀਵੜਗਨ ਆਪਣੀ ਕੈਂਸਰ ਪੀੜਤ ਪਤਨੀ ਦਾ ਇਲਾਜ ਕਰਵਾਉਣ ਲਈ ਉਸ ਨੂੰ ਸਾਈਕਲ ’ਤੇ ਬਿਠਾ ਕੇ 130 ਕਿਲੋਮੀਟਰ ਦਾ ਪੈਂਡਾ ਤੈਅ ਕਰ ਕੇ ਹਸਪਤਾਲ ਪਹੁੰਚਿਆ। ਉਸ ਨੇ ਇਹ ਰਸਤਾ ਕਰੀਬ 12 ਘੰਟਿਆਂ ਵਿੱਚ ਤੈਅ ਕੀਤਾ ਅਤੇ ਰਸਤੇ ਉਹ ਸਿਰਫ਼ ਚਾਹ ਪੀਣ ਜਾਂ ਕੁਝ ਖਾਣ ਲਈ ਰੁਕਿਆ। ਲੌਕਡਾਊਨ ਕਾਰਨ ਅੰਤਰਰਾਜੀ ਬੱਸ ਸੇਵਾ ਬੰਦ ਹੈ ਅਤੇ ਉਸ ਕੋਲ ਕਿਰਾਏ ’ਤੇ ਟੈਕਸੀ ਕਰਨ ਲਈ ਪੈਸੇ ਨਹੀਂ ਸਨ। ਹਸਪਤਾਲ ਸਟਾਫ਼ ਨੇ ਅਰੀਵੜਗਨ ਦੇ ਇਰਾਦੇ ਦੀ ਪ੍ਰਸ਼ੰਸਾ ਕੀਤੀ।