ਪੰਜਾਬ

ਆਈ.ਜੀ. ਲੁਧਿਆਣਾ ਰੇਂਜ ਸੁਰਿੰਦਰਪਾਲ ਸਿੰਘ ਪਰਮਾਰ ਨੇ ਕੀਤੀ ਅਗਵਾਈ 
ਮੁੱਲਾਂਪੁਰ ਦਾਖਾ 20 ਜੁਲਾਈ = (ਸਤਵਿੰਦਰ ਸਿੰਘ ਗਿੱਲ) ਚਿੱਟੇ ਨਸ਼ੇ ਕਰਕੇ ਹਲਕਾ ਦਾਖਾ ਦਾ ਪਿੰਡ ਮੰਡਿਆਣੀ ਬਹੁਚਰਿਚਤ ਹੋਣ ਕਰਕੇ ਅੱਜ ਆਈ.ਜੀ.ਲੁਧਿਆਣਾ ਰੇਂਜ ਸੁਰਿੰਦਰਪਾਲ ਸਿੰਘ ਪਰਮਾਰ ਦੀ ਅਗਵਾਈ ਹੇਠ ਪੁਲਿਸ ਜਿਲ੍ਹਾ ਲੁਧਿਆਣਾ ਦੇ ਐੱਸ.ਐੱਸ.ਪੀ ਦੀਪਕ ਹਿਲੇਰੀ ਵੱਲੋਂ ਪੂਰੇ ਆਪਣੇ ਲਾਮ ਲਸ਼ਕਰ ਨਾਲ ਸਰਚ ਅਪ੍ਰੇਸ਼ਨ ਕੀਤਾ ਗਿਆ। ਚਿੱਟਾ ਵੇਚਣ ਵਾਲਿਆਂ ਦੇ ਘਰਾਂ ਦੀ ਜਿੱਥੇ ਤਲਾਸ਼ੀ ਲਈ ਉੱਥੇ ਹੀ ਆਮ ਘਰਾਂ ਅੰਦਰ ਵੀ ਪੁਲਿਸ ਗਈ। ਪੁਲਿਸ ਮੁਲਾਜਮਾਂ ਨੇ ਰਾਹਗੀਰਾਂ ਤੇ ਪਿੰਡ ਅੰਦਰ ਆਉਣ ਵਾਲਿਆਂ ਦੀ ਵੀ ਚੈਕਿੰਗ ਕੀਤੀ।
               ਆਈ.ਜੀ.ਐੱਸ.ਪੀ.ਐੱਸ ਪਰਮਾਰ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆ ਕਿਹਾ ਕਿ ਪੁਲਿਸ ਨੂੰ ਤੁਹਾਡੇ ਸਹਿਯੋਗ ਦੀ ਲੋੜ ਹੈ, ਜੇਕਰ ਤੁਸੀ ਬੇਖੌਫ ਪੁਲਿਸ ਦਾ ਸਾਥ ਦੇਵੋਂ ਤਾਂ ਚਿੱਟੇ (ਨਸ਼ੇ) ਦਾ ਪੰਜਾਬ ਵਿੱਚੋਂ ਖਾਤਮਾ ਹੀ ਹੋ ਜਾਵੇ। ਉਨ੍ਹਾਂ ਸਰਪੰਚ ਗੁਰਪ੍ਰੀਤ ਕੌਰ ਦੀ ਸ਼ਲਾਘਾ ਕਰਦਿਆ ਕਿਹਾ ਕਿ ਇਹ ਦਲੇਰ ਔਰਤ ਹੈ, ਜਿਸਨੇ ਆਪਣੇ ਪੱਧਰ ’ਤੇ ਇਹ ਕਾਰਜ ਕੀਤਾ ਹੈ, ਉਨ੍ਹਾਂ ਲੋਕਾਂ ਨੂੰ ਅਪੀਲ ਕਰਦਿਆ ਕਿਹਾ ਕਿ ਬੇਝਿਜਕ ਪੁਲਿਸ ਦਾ ਸਾਥ ਦੇਵੋਂ ਤਾਂ ਸਾਡੀ ਨੌਜਵਾਨ ਪੀੜ੍ਹੀ ਬਚ ਸਕੇ। ਆਈ.ਜੀ.ਐੱਸ.ਪੀ.ਐੱਸ ਪਰਮਾਰ ਨੇ ਅੱਗੇ ਦੱਸਿਆ ਕਿ ਪੁਲਿਸ ਪ੍ਰਸ਼ਾਸ਼ਨ ਨਸ਼ਿਆਂ ਨੂੰ ਰੋਕਣ ਲਈ ਪੂਰੀ ਤਰ੍ਹਾਂ ਸੁਹਿਰਦ ਹੈ, ਪੁਲਿਸ ਜਿਲ੍ਹਾ ਜਗਰਾਓ ਅਧੀਂਨ ਆਉਂਦੇ 70 ਪਿੰਡਾਂ ਅੰਦਰ ਰੋਜਾਨਾਂ ਇਸ ਤਰ੍ਹਾਂ ਦਾ ਸਰਚ ਅਪ੍ਰੇਸ਼ਨ ਚਲਾਇਆ ਜਾਵੇਗਾ।
               ਐੱਸ.ਐੱਸ.ਪੀ ਦੀਪਕ ਹਿਲੇਰੀ ਨੇ ਦੱਸਿਆ ਕਿ ਚਿੱਟਾ ਵੇਚਣ ਵਾਲਿਆਂ ਖਿਲਾਫ ਮੁਕੱਦਮਾ ਨੰਬਰ 128  ਤਹਿਤ ਦਰਜ ਕਰਕੇ 16 ਮਰਦ / ਔਰਤਾਂ ਨਾਮਜ਼ਦ ਕੀਤਾ ਹੈ, ਜਿਸ ਵਿੱਚ 3 ਔਰਤਾਂ ਨੂੰ ਗਿ੍ਰਫਤਾਰ ਕਰ ਲਿਆ ਹੈ। ਇਸ ਮੌਕੇ ਐੱਸ.ਪੀ ਮੈਡਮ ਹਰਕਮਲ ਕੌਰ ਬਰਾੜ, ਡੀ.ਐੱਸ.ਪੀ. ਜਸ਼ਨਦੀਪ ਸਿੰਘ, ਡੀ.ਐੱਸ.ਪੀ ਸਤਵਿੰਦਰ ਸਿੰਘ ਵਿਰਕ, ਡੀ.ਐੱਸ.ਪੀ ਗੁਰਬਾਜ ਸਿੰਘ, ਡੀ.ਐੱਸ.ਪੀ ਦਿਲਬਾਗ ਸਿੰਘ, ਇੰਸਪੈਕਟਰ ਅਜੀਤਪਾਲ ਸਿੰਘ ਸਮੇਤ ਵੱਡੀ ਤਾਦਾਦ ਵਿੱਚ ਪੁਲਿਸ ਮੁਲਾਜਮ ਹਾਜਰ ਸਨ।
          ਜਿਕਰਯੋਗ ਹੈ ਕਿ ਬੀਤੇ ਕੱਲ੍ਹ ਪਿੰਡ ਮੰਡਿਆਣੀ ਵਿਖੇ ਚਿੱਟੇ ਨਸ਼ੇ ਵਿਕਣ ਦੇ ਵਿਰੋਧ ਵਿੱਚ ਪਿੰਡ ਵਾਸੀਆਂ ਵੱਲੋਂ ਮਹਿਲਾ ਸਰਪੰਚ ਗੁਰਪ੍ਰੀਤ ਕੌਰ ਦੀ ਅਗਵਾਈ ਹੇਠ ਧਰਨਾ ਲਾ ਕੇ ਪੁਲਿਸ ਪ੍ਰਸ਼ਾਸਨ ਨੂੰ ਜਗਾਇਆ ਸੀ।

ਜਗਰਾਉਂ ( ਪੱਪੂ ਜਗਰਾਉਂ  ) ਸਥਾਨਕ ਸ਼ਹਿਰ ਨੇੜੇ ਸਾਇੰਸ ਕਾਲਜ ਦੇ ਚ ਜਸਪ੍ਰੀਤ ਕੌਰ ਦੀ ਅਗਵਾਈ ਹੇਠ ਤੀਆਂ ਦਾ ਤਿਉਹਾਰ ਮਨਾਇਆ ਬੜੇ ਉਤਸ਼ਾਹ ਨਾਲ ਮਨਾਇਆ ਗਿਆ।ਇਸ ਸਮੇਂ ਜਸਪ੍ਰੀਤ ਕੌਰ ਨੇ ਦੱਸਿਆ ਹੈ ਕਿ ਵਿਰਸੇ ਦੀ ਯਾਦ ਤਾਜ਼ਾ ਰੱਖਣ ਲਈ ਤੀਆਂ ਦੇ ਤਿਉਹਾਰ ਵਿੱਚ ਵਿਸ਼ੇਸ਼ ਤੌਰ ਤੇ ਪਹੁੰਚੇ ਮੁੱਖ ਮਹਿਮਾਨ ਸਰਦਾਰ ਬਲਦੇਵ ਸਿੰਘ ਨੇ ਕਿਹਾ ਹੈ ਪੱਛਮੀ ਸੱਭਿਅਤਾ ਵੱਲ ਜਾ ਰਹੇ ਨਵੀਂ ਪੀੜ੍ਹੀ ਨੂੰ ਆਪਣੇ ਸ਼ਾਨਦਾਰ ਵਿਰਸੇ ਤੋਂ ਜਾਣੂ ਕਰਵਾਇਆ ਜਾ ਸਕੇ।ਉਨ੍ਹਾਂ ਕਿਹਾ ਹੈ ਕਿ ਰੁਝੇਵੇਂ ਭਰਪੂਰ ਜ਼ਿੰਦਗੀ ਵਿਚ ਕੁਝ ਪਲ ਹੱਸਣਾ ਖੇਡਣਾ ਤੇ ਨੱਚਣ ਲਈ ਕੱਢਣਾ ਕੱਢਣੀ ਵੀ ਬਹੁਤ ਜ਼ਰੂਰੀ ਹਨ।ਇਸ ਦੌਰਾਨ ਮਹਿਲਾਵਾਂ ਕੁੜੀਆਂ ਨੇ ਗਿੱਧਾ ਭੰਗੜਾ ਪਾ ਕੇ ਅਨੰਦ ਮਾਣਿਆ।ਇਸ ਸਮੇਂ ਨਗਰ ਕੌਂਸਲ ਦੇ ਪ੍ਰਧਾਨ ਜਤਿੰਦਰਪਾਲ ਸਿੰਘ ਰਾਣਾ ਨੇ ਆਪਣੀ ਨਵੀਂ ਪੀੜ੍ਹੀ ਨੂੰ ਮਹਾਨ ਸੱਭਿਆਚਾਰ ਤੋਂ ਜਾਗਰੂਕ ਕਰਵਾਇਆ।ਇਸ ਮੌਕੇ ਮੁਟਿਆਰਾਂ ਨੇ ਗਿੱਧਾ ਤੇ ਬੋਲੀਆਂ ਪਾ ਕੇ ਖੂਬ ਰੰਗ ਬੰਨ੍ਹਿਆ।ਇਸ ਸਮੇਂ ਵੱਡੀ ਗਿਣਤੀ ਵਿੱਚ ਮੁਟਿਆਰਾਂ ਹਾਜ਼ਰ ਸਨ। ਇਸ ਸਮੇਂ ਐੱਮ ਸੀ ਮੇਸ਼ੀ ਸਹੋਤਾ, ਨਛੱਤਰ ਸਿੰਘ ਸਹੋਤਾ,ਜੋਬਨਪ੍ਰੀਤ ਸਿੰਘ ਰੂਮੀ, ਰਮੇਸ਼ ਸਿੰਘ ਸਹੋਤਾ, ਧਰਮਵੀਰ ਗੋਇਲ ਅਤੇ ਗਾਊਸ਼ਾਲਾ ਦੇ ਸਾਰੇ ਮੈਂਬਰ ਵੀ ਸ਼ਾਮਲ ਸਨ। ਇਨ੍ਹਾਂ ਦਾ ਤੀਆਂ ਦੇ ਤਿਉਹਾਰ ਵਿੱਚ ਬਹੁਤ ਵੱਡਾ ਯੋਗਦਾਨ ਪਾਇਆ ਗਿਆ

ਮੌਜੂਦਾ ਦੌਰ ਦੇ ਸਿਨਮੇ ਵਿੱਚ ਨਿੱਤ ਦਿਨ ਬਦਲਾਓ ਨਜ਼ਰ ਆ ਰਿਹਾ ਹੈ। ਨਵੇਂ ਵਿਸ਼ਿਆਂ ਦੇ ਨਾਲ-ਨਾਲ ਨਵੇਂ ਖੂਬਸੁਰਤ ਕਲਾਵਾਨ ਚਿਹਰੇ ਪੰਜਾਬੀ ਪਰਦੇ ਦਾ ਸਿੰਗਾਰ ਬਣਨ ਜਾ ਰਹੇ ਹਨ। ਅਜਿਹੀ ਹੀ ਨਵੇਂ ਵਿਸ਼ੇ ਦੀ ਫਿਲਮ ਹੈ ‘ਸ਼ੱਕਰਪਾਰੇ’ ਜੋ ਬਹੁਤ ਜਲਦ ਪੰਜਾਬੀ ਦਰਸ਼ਕਾਂ ਦਾ ਮਨੋਰੰਜਨ ਕਰਨ ਆ ਰਹੀ ਹੈ। ਇਸ ਫ਼ਿਲਮ ਦਾ ਟਰੇਲਰ ਬੀਤੇ ਦਿਨੀਂ ਜਾਰੀ ਕੀਤਾ ਗਿਆ ਹੈ ਜਿਸ ਨੂੰ ਵੇਖਦਿਆਂ ਕਹਿ ਸਕਦੇ ਹਾਂ ਕਿ ਹਿਹ ਫ਼ਿਲਮ ਮਨੋਰੰਜਨ ਭਰਪੂਰ ਮਸਾਲਾ ਹੈ। ਫ਼ਿਲਮ ਦੇ ਹਰੇਕ ਕਲਾਕਾਰ ਨੇ ਆਪਣੀ ਬਾਕਮਾਲ ਅਦਾਕਾਰੀ ਦੀ ਪੇਸ਼ਕਾਰੀ ਕੀਤੀ ਹੈ।  ਫ਼ਿਲਮ ਦੇ ਟਾਇਟਲ ਦੀ ਗੱਲ ਕਰੀਏ ਤਾਂ ‘ਸ਼ੱਕਰਪਾਰੇ’ ਪੰਜਾਬ ਦੀ ਰਵਾਇਤੀ ਮਿਠਾਈ ਦਾ ਨਾਂ ਹੈ, ਜਿਸਦੀ ਮਹਿਕ ਅਤੇ ਮਿਠਾਸ ਬਿਨਾਂ ਕੋਈ ਵੀ ਵਿਆਹ ਅਧੂਰਾ ਹੁੰਦਾ ਹੈ। ਪੰਜਾਬੀ ਸਿਨਮੇ ਵਿੱਚ ‘ਸ਼ੱਕਰਪਾਰੇ’ ਦੀ ਸਮੂਲੀਅਤ ਦਰਸ਼ਕਾਂ ਨੂੰ ਇੱਕ ਨਵੇਂ ਮਨੋਰੰਜਨ ਭਰੇ ਸੁਆਦ ਨਾਲ ਜੋੜੇਗੀ। ਗੋਲਡਨ ਕੀ ਐਂਟਰਟੈਨਮੈਂਟ ਦੇ ਬੈਨਰ ਹੇਠ ਨਿਰਮਾਤਾ ਵਿਸ਼ਨੂ ਕੇ ਪੋਡਰ ਅਤੇ ਪੁਨੀਤ ਚਾਵਲਾ ਦੀ ਇਸ ਫਿਲਮ ਦਾ ਹੀਰੋ ਇਕਲਵਿਆ ਪਦਮ ਹੈ ਜੋ ਇਸ ਫਿਲਮ ਰਾਹੀਂ ਆਪਣੇ ਫ਼ਿਲਮੀ ਸਫ਼ਰ ਦਾ ਆਗਾਜ਼ ਕਰ ਰਹੇ ਹਨ। ਨਿਰਦੇਸ਼ਕ ਵਰੁਣ ਐਸ ਖੰਨਾ ਦਾ ਕਹਿਣਾ ਹੈ ਕਿ ਇਸ ਨਿਵੇਕਲੀ ਫ਼ਿਲਮ ਦੀ ਕਹਾਣੀ ਮੌਜੂਦਾ ਸਿਨਮੇ ਤੋਂ ਬਹੁਤ ਹੱਟਵੀਂ ਅਤੇ ਦਿਲਚਸਪ ਹੋਵੇਗੀ। ਪਿਆਰ-ਮੁਹੱਬਤ ਅਤੇ ਕਾਮੇਡੀ ਨਾਲ ਭਰਪੂਰ ਫ਼ਿਲਮ ‘ਸ਼ੱਕਰਪਾਰੇ’ ਵਿੱਚ ਇਕਲਵਿਆ ਪਦਮ ਤੇ ਲਵ ਗਿੱਲ ਦੀ ਖੂਬਸੁਰਤ ਜੋੜੀ ਨੇ ਮੁੱਖ ਭੂਮਿਕਾ ਨਿਭਾਈ ਹੈ ਜਦਕਿ ਸਰਦਾਰ ਸੋਹੀ, ਸਵਿੰਦਰ ਮਾਹਲ,ਨਿਰਮਲ ਰਿਸ਼ੀ, ਸੀਮਾ ਕੌਸ਼ਲ,ਹਨੀ ਮੱਟੂ, ਦਿਲਾਵਰ ਸਿੱਧੂ, ਰਮਨਦੀਪ ਜੱਗਾ,ਅਰਸ਼ ਹੁੰਦਲ, ਗੋਨੀ ਸੱਗੂ ਅਤੇ ਮੋਨਿਕਾ ਆਦਿ ਅਹਿਮ ਕਿਰਦਾਰਾਂ ਵਿੱਚ ਨਜ਼ਰ ਆਉਣਗੇ। ਇਸ ਫ਼ਿਲਮ ਵਿੱਚ ਇੱਕ ਪਿਆਰੇ ਜਿਹੇ ਕਤੂਰੇ ਦਾ ਵੀ ਅਹਿਮ ਕਿਰਦਾਰ ਹੈ। ਵੇਖਦੇ ਹਾਂ ਕਿ ਇਹ ਕਤੂਰਾ ਫ਼ਿਲਮ ਵਿਚਲੇ ਦੋ ਪ੍ਰੇਮੀਆਂ ਨੂੰ ਮਿਲਾਉਂਦਾ ਹੈ ਜਾਂ ਫਿਰ ਪਿਆਰ ਵਿੱਚ ਰੋੜਾ ਬਣਦਾ ਹੈ। ਫ਼ਿਲਮ ਦੀ ਹੀਰੋਇਨ ਦੀ ਗੱਲ ਕਰੀਏ ਤਾ ਅਦਾਕਾਰਾ ਲਵ ਗਿੱਲ ਇੱਕ ਜਾਣੀ ਪਛਾਣੀ ਅਦਾਕਾਰਾ ਹੈ। ਜਿਸਨੇ ਇਸ ਤੋਂ ਪਹਿਲਾਂ ਛੋਟੇ ਪਰਦੇ ਦੇ ਅਨੇਕਾਂ ਲੜੀਵਾਰਾਂ ਤੋਂ ਇਲਾਵਾ ਪੰਜਾਬੀ ਫ਼ਿਲਮ ‘ਕੁੜੀਆਂ ਜਵਾਨ ਬਾਪੂ ਪ੍ਰੇਸ਼ਾਨ’ ਵਿੱਚ ਵੀ ਮੁੱਖ ਭੂਮਿਕਾ ਨਿਭਾਈ ਹੈ। ਫਿਲਮ ਦਾ ਹੀਰੋ ਇਕਲਵਿਆ ਪਦਮ ਵੀ ਕਮਾਲ ਦਾ ਅਦਾਕਾਰ ਹੈ। ਉਸਨੇ ਇਸ ਫਿਲਮ ਰਾਹੀਂ ਵੱਡੇ ਪਰਦੇ ਵੱਲ ਕਦਮ ਵਧਾਇਆ ਹੈ ਉਮੀਦ ਹੈ ਕਿ ਦੋਵਾਂ ਦੀ ਜੋੜੀ ਪੰਜਾਬੀ ਦਰਸ਼ਕਾਂ ਨੂੰ ਜਰੂਰ ਪਸੰਦ ਆਵੇਗੀ।ਫ਼ਿਲਮ ਦੀ ਕਹਾਣੀ ਵਿਵੇਕ ਮਿਸ਼ਰਾ ਨੇ ਲਿਖੀ ਹੈ। ਡਾਇਲਾਗ ਜੱਸੀ ਢਿੱਲੋਂ ਅਤੇ ਸਰਬਜੀਤ ਸੰਧੂ ਨੇ ਲਿਖੇ ਹਨ। ਇਸ ਫ਼ਿਲਮ ਦੀ ਸੂਟਿੰਗ ਚੰਡੀਗੜ੍ਹ, ਮੋਹਾਲੀ ਅਤੇ ਮਨਾਲੀ ਦੀਆਂ ਸ਼ਾਨਦਾਰ ਲੁਕੇਸ਼ਨਾਂ ’ਤੇ ਕੀਤੀ ਗਈ ਹੈ ਤੇ ਬਹੁਤ ਜਲਦ ਇਹ ਫ਼ਿਲਮ ਪੰਜਾਬੀ ਸਿਨੇਮਿਆਂ ਦਾ ਸ਼ਿੰਗਾਰ ਬਣਨ ਜਾ ਰਹੀ ਹੈ। ਪਿਆਰ ਮੁਹੱਬਤ ਦੀ ਨੋਕ ਝੋਕ ਅਤੇ ਕਾਮੇਡੀ ਭਰਪੂਰ ਇਹ ਫ਼ਿਲਮ 5 ਅਗਸਤ ਨੂੰ ਪੰਜਾਬੀ ਸਿਨੇਮਿਆਂ ਦਾ ਸ਼ਿੰਗਾਰ ਹੋਵੇਗੀ।                 

 ਹਰਜਿੰਦਰ ਸਿੰਘ ਜਵੰਦਾ 9463828000

ਸਾਉਣ ਮਹੀਨਾ ਚੜ ਗਿਆ ਕੁੜੀਓ,
ਮਨ ਨੂੰ ਚਾਅ ਜਾ ਚੜ੍ਹਿਆ ਨੀ ਕੁੜੀਓ।
ਪਿੱਪਲੀ ਪੀਘਾਂ ਪਾਈਆਂ ਝੂਟਦੀਆਂ ਰਲ ਕੇ,
ਲੋਕੀ ਵੇਖਣ ਖੜ ਖੜ ਖੜਕੇ।
ਚੂੜੀਆਂ ਪਾਉਣ ਰੰਗ ਵਰੰਗੀਆ,
ਤੀਆਂ ਲਾਵਣ ਰਲ ਕੇ ਕੁੜੀਆਂ।
ਮਨ ਦੇ ਭੇਦ ਸਾਰੇ ਫਰੋਲਦੀਆਂ,
ਵਿੱਚ ਬੋਲੀਆਂ ਸੁਣਾ ਕੇ ਬੋਲਦੀਆਂ।
 ਖੀਰ ਪੂੜੇ ਖਾਵਣ ਲੋਕੀ,
ਪੂਜਾ ਸਾਵਣ ਦਾ ਨਜ਼ਾਰਾ ਮਾਨਣ ਲੋਕੀ।
ਸਾਵਣ ਵਿੱਚ ਮੀਂਹ ਵੀ ਕਿਣ ਮਿਣ ਕਰਦਾ,
ਪੈਲਾ ਪਾ ਕੇ ਮੋਰ ਵੀ ਨੱਚਦਾ।
ਕੁੜੀਆ ਦੇ ਮਨ ਦੀ ਇਕੋ ਰੀਝ,
ਮਨਾਉਂਦੀਆਂ ਮਿਲ ਕੇ ਹਰਿਆਲੀ ਤੀਜ।
ਮਹਿੰਦੀ ਲਾਉਂਦੀਆਂ ਹੋ ਕੇ ਮਗਨ,
ਸਾਵਣ ਦਾ ਇਹ ਹੁੰਦਾ ਸਗਨ।
ਸਾਵਣ ਮਹੀਨਾ ਕੁਦਰਤੀ ਸੁੰਦਰਤਾ ਕਰੇ ਬਿਆਨ,
ਹਰਿਆਲੀ ਦੇ ਗੁਣ ਬੜੇ ਮਹਾਨ।
ਪੂਜਾ ਰਤੀਆ
9815591967

 ਜਨ ਸ਼ਕਤੀ

“ਉਘੜ ਗਿਆ ਜੈਸੇ ਖੋਟਾ ਡਬੂਆ , ਜਾਂ ਨਜ਼ਰ ਸਰਾਫੇ ਆਇਆ “ ਇਕ ਧਾਤ ਦੇ ਡੱਬੇ ਨੂੰ ਉਦੋਂ ਤੱਕ ਕਈ ਵਾਰ ਲੋਕ ਸੋਨਾ ਸਮਝਣ ਦਾ ਭੁਲੇਖਾ ਖਾ ਜਾਂਦੇ ਹਨ , ਪਰ ਉਸ ਦੀ ਅਸਲੀ ਪਛਾਣ ਬਾਰੇ ਧੋਖਾ ਇਕ ਸਰਾਫ਼ਾ (ਸੁਨਿਆਰਾ) ਹੀ ਦੱਸਦਾ ਹੈ ਜਦ ਇਕ ਸਿਰਫ਼ ਧਾਤੂ ਡਬੂਆ ਸੁਨਿਆਰੇ ਦੀ ਨਿਗਾ ਚੜਦਾ ਹੈ ।
 ਸਿਮਰਨਜੀਤ ਸਿੰਘ ਮਾਨ ਨੇ ਸ਼ਹੀਦ ਭਗਤ ਸਿੰਘ ਦੀ ਦੇਸ਼ ਪ੍ਰਤੀ ਕੁਰਬਾਨੀ ਨੂੰ ਅੱਤਵਾਦੀ ਆਧਾਰ  ਕਹਿਕੇ  ਸ਼ਹਾਦਤਾਂ ਦੇ ਸੁਨਹਿਰੀ ਇਤਿਹਾਸ ਨਾਲ ਧੋਖਾ ਕੀਤਾ ਹੈ । ਅੰਗਰੇਜ਼ ਰਾਜ ਦੇ ਰਹਿ ਚੁੱਕੇ ਸਫ਼ੈਦਪੋਸ਼ ਤੇ ਇਸ ਪਿਠੂ ਪਰਵਾਰ ਨੇ ਹਮੇਸ਼ਾ ਸਿੱਖਾਂ ਅਤੇ ਪੰਜਾਬੀਅਤ ਦਾ ਘਾਣ ਹੀ ਕਰਵਾਇਆ ਹੈ । - ਸਿੱਖ ਅਤੇ ਪੰਜਾਬੀਆਂ ਦੇ ਵਿਰਸੇ , ਇਤਿਹਾਸ ਨੂੰ ਗਲਤ ਰੰਗਤ ਦੇ ਕੇ ਆਪਣੀਆਂ ਰੋਟੀਆਂ ਸੇਕਣੀਆਂ ਇਹਨਾਂ ਦੇ ਨਾਨਾ ਜੀ ਜਥੇਦਾਰ ਅਰੂੜ੍ਹ ਸਿੰਘ ਸਮੇਂ ਤੋਂ ਪ੍ਰਚਲਿਤ ਚੱਲਿਆ ਆ ਰਿਹਾ ਹੈ । ਅੱਜ ਉਹੀ ਸੋਚ ਸਰਦਾਰ ਮਾਨ ਦੇ ਅੰਦਰ ਕੁੱਟ ਕੁੱਟ ਕੇ ਭਰੀ ਹੋਈ ਬੋਲ ਰਹੀ ਹੈ । ਸ਼ਹੀਦੀ ਆਜਮ ਸਰਦਾਰ ਭਗਤ ਸਿੰਘ ਜਿਸ ਦੀ ਸੋਚ ਅੰਗਰੇਜ਼ ਤੋਂ ਆਜ਼ਾਦ ਹੋਣਾ ਸੀ , ਉਸ ਨੇ ਤਨ, ਮਨ  ਕਰਕੇ ਉਹੀ ਕੁਰਬਾਨੀ ਦਿੱਤੀ ਜੋ ਗੁਰੂ ਗੋਬਿੰਦ ਸਿੰਘ ਜੀ ਨੇ ਆਦੇਸ਼ ਦਿੱਤਾ ਸੀ । ਇਤਿਹਾਸਕ ਅੰਕੜੇ ਗਵਾਹ ਹਨ ਕਿ ਜਦ ਅਮਰੀਕਾ, ਕੈਨੇਡਾ ਤੋਂ ਗਦਰੀ ਬਾਬਿਆਂ ਨੇ ਦੇਸ਼ ਦੀ ਆਜ਼ਾਦੀ ਲਈ ਦੇਸ਼  ਵਾਪਸ ਆਉਣ ਦਾ ਫੈਸਲਾ ਲਿਆ , ਕਿ ਆ ਕੇ ਅੰਗਰੇਜ਼ ਵਿਰੁੱਧ ਆਜ਼ਾਦੀ ਦਾ ਜਹਾਦ ਵਿਕਣਗੇ , ਕਲਕੱਤੇ ਬੰਦਰਗਾਹ ਤੇ ਉਹਨਾਂ ਦੇ ਜਹਾਜ਼ ਨੂੰ ਰੋਕ ਕੇ ਅੰਗਰੇਜ਼ ਸਾਮਰਾਜ ਨੇ ਤੋਪਾਂ ਗੋਲੀਆਂ , ਇਹਨਾਂ ਸਿੱਖਾਂ ਨੂੰ ਮੌਤ ਦੇ ਘਾਟ ਉਤਾਰਿਆ , ਸੈਂਕੜੇ ਉੱਥੇ ਮਾਰੇ , ਜੋ ਬੱਚੇ ਉਹ ਔਕੜਾਂ ਵਿਚੀ ਵਿਚਰਦੇ ਪੰਜਾਬ ਆਏ । ਉਹਨਾਂ ਵਿੱਚੋਂ ਬੱਬਰ ਅਕਾਲੀ ਲਹਿਰ ਨੇ ਜਨਮ ਲਿਆ । ਮਾਨ ਦੇ ਨਾਨਾ ਜੀ ਨੇ ਅੰਗਰੇਜ਼ ਦੀ ਪਿੱਠ ਪੂਰਦਿਆਂ , ਕਲਕੱਤੇ ਗਦਰੀ ਬਾਬਿਆਂ ਦੀਆਂ ਸ਼ਹਾਦਤਾਂ ਵਿਰੁੱਧ ਅਕਾਲ ਤਖਤ ਤੋਂ ਜੋ ਮਤਾ ਲਿਖ ਕੇ ਦਿੱਤਾ - ਉਸ ਮਤੇ ਦੇ ਅੱਖਰ ਇਸ ਤਰਾਂ ਹਨ — “ ਕਲਕੱਤੇ , ਬਜਬਜਘਾਟ ਵਿਖੇ ਜੋ ਆਦਮੀ (ਵਿਅਕਤੀ) ਅੰਗਰੇਜ਼ ਸਰਕਾਰ ਦੁਆਰਾ ਮਾਰੇ ਗਏ , ਉਹ ਸਿੱਖ ਨਹੀਂ ਸਨ ਅਤੇ ਪੰਜਾਬੀ ਭੀ ਨਹੀਂ ਸਨ “ (ਪੂਰੀ ਵਿਥਿਆ ਪੜੋ ਸਿੱਖ ਇਤਿਹਾਸ ਕਿਤਾਬ- “ਅਕਾਲੀ ਮੋਰਚੇ ਅਤੇ ਝਬਰ “ ਵਿੱਚੋਂ ) ਜਦ ਅੰਗਰੇਜ਼ ਸਾਮਰਾਜ ਦੇ ਜਨਰਲ ਡਾਇਰ ਨੇ ਸੰਮਤ 1919 ਦੀ ਵਿਸਾਖੀ ਵਾਲੇ ਦਿਨ , ਅੰਮਰਤਸਰ , ਜਲਿਆਂ ਵਾਲੇ ਬਾਗ ਵਿੱਚ ਇਕੱਤਰ ਹੋਏ ਸਿੱਖਾਂ ਨੂੰ ਮਸ਼ੀਨਗੰਨਾਂ ਤੇ ਪੁਲੀਸ ਗੋਲੀਆਂ ਨਾਲ ਸੈਂਕੜੇ ਸਿੱਖਾਂ ਨੂੰ ਸ਼ਹੀਦ ਕੀਤਾ । ਇਸੇ ਮਾਨ ਸਾਹਿਬ ਦੇ ਨਾਨੇ ਜਥੇਦਾਰ ਅਰੂੜ੍ਹ ਸਿੰਘ ਨੇ ਜਲਿਆਂ ਵਾਲੇ ਬਾਗ ਦੇ ਸਾਕੇ ਦੇ ਦੋਸ਼ੀ ਜਨਰਲ ਡਾਇਰ ਨੂੰ ਅਕਾਲ ਤਖਤ ਵਿਖੇ ਸਿਰੋਪਾ ਦੇ ਕੇ ਕੌਮੀ ਅਪਰਾਧ ਕੀਤਾ । ਮਾਨ ਸਾਹਿਬ ਨੇ ਹੁਣੇ ਇਕ ਤਾਜ਼ੀ ਵੀਡੀਓ ਵਿੱਚ ਆਪਣੇ ਨਾਨੇ ਦਾ ਪੱਖ ਪੂਰਦਿਆਂ ਇਹ ਕਿਹਾ ਕਿ “ ਕਿ ਮੇਰੇ ਨਾਨਾ ਜੀ ਨੇ ਡਾਇਰ ਨੂੰ ਸਿਰੋਪਾ ਦੇਕੇ ਉਸ (ਡਾਇਰ) ਦਾ ਹੋਰ  ਵੱਧ ਰਹੇ ਕ੍ਰੋਧ ਨੂੰ ਠੰਡਾ ਕਰਨ ਲਈ ਕੀਤਾ ਸੀ । ਕਹਾਣ ਹੈ ਕਿ “ਖ਼ਵਾਜੇ ਦਾ ਗਵਾਹ ਡੱਡੂ “ ਮਾਨ ਸਾਹਿਬ ਡਾਇਰ ਤਾਂ ਇਕ ਘੋਰ ਅਪਰਾਧੀ ਤੇ ਜ਼ਹਿਰੀਲਾ ਸੱਪ ਸੀ , ਪਰੰਤੂ ਤੁਹਾਡਾ ਨਾਨਾ ਜੀ ਤਾਂ ਕੋਈ “ਸਪੇਰਾ” ਨਹੀਂ ਸਨ । ਉਹ ਤਾਂ ਉੱਪਰ ਦੱਸੇ ਇਤਿਹਾਸਕ ਅੰਕੜਿਆਂ ਅਨੁਸਾਰ ਸਿੱਖ ਅਤੇ ਭਾਰਤ ਦੀ ਆਜ਼ਾਦੀ ਦੇ ਇਤਿਹਾਸ ਵਿੱਚ ਦੋਸ਼ੀ ਪਾਏ ਗਏ ਹਨ , ਜਿਨਾਂ ਅਕਾਲ ਤਖਤ ਸਾਹਿਬ ਦੀ ਪਦਵੀ ਦੀ ਦੁਰਵਰਤੋਂ ਕੀਤੀ । ਨਾਨਾ ਸਾਹਿਬ ਨੇ ਅੰਗਰੇਜ਼ ਦੇ ਅੱਤਿਆਚਾਰਾਂ ਦੀ ਹਮੇਸ਼ਾ ਪਿੱਠ ਪੂਰੀ ਅਤੇ ਕੌਮ ਨਾਲ ਦਗਾ ਕੀਤਾ । ਮਾਨ ਸਾਹਿਬ ਨੂੰ ਚੇਤੇ ਕਰਵਾਉਂਦੇ ਹਾਂ , ਜਦੋਂ ਇਹ ਪੁਲੀਸ ਦੀ ਨੌਕਰੀ ਛੱਡ ਕੇ ਪੰਥਕ ਮੋਹਰੀਆਂ ਵਿੱਚ ਦਾਖਲ ਹੋਏ ਸਨ ਤਾਂ ਇਕ ਸਟੇਟਮੈਂਟ ਵਿੱਚ ਇਹਨਾਂ ਆਪਣੇ ਨਾਨੇ ਦੀ ਉਪਰੋਕਤ ਕਰਨੀਆਂ ਨੂੰ ਵੱਡੀਆਂ ਗਲਤੀਆਂ ਦੱਸਿਆ ਸੀ । ਕੀ ਕਾਂਗਰਸ ਸਰਕਾਰ ਦੇ ਪੁਲਿਸ ਅਫਸਰ ਵਜੋਂ ਉਸ ਸਮੇਂ ਪੰਥਕ ਪਿੜ ਵਿੱਚ ਦਾਖਲ ਹੋਣਾ ?ਕੀ ਇਹ ਸਿੱਖ ਪੰਥ ਵਿਰੋਧੀ ਸਾਜ਼ਿਸ਼ ਹੀ ਸੀ ? ਜੋ ਅੱਜ ਪ੍ਰਤੱਖ ਰੂਪ ਵਿੱਚ ਸਾਹਮਣੇ ਸਾਫ਼ ਨਜ਼ਰ ਆ ਰਹੀ ਹੈ । ਇੱਥੇ ਹੀ ਬੱਸ ਨਹੀਂ ਸ਼ਹੀਦ ਭਗਤ ਸਿੰਘ ਵਿਰੁੱਧ ਕਬੋਲ ਬੋਲ ਕੇ ਇਹਨਾਂ ਇਕ ਅਪਰਾਧਕ ਰਸਤਾ ਅਪਨਾਇਆ ਹੈ । ਕੱਲ ਨੂੰ ਇਹ ਆਪਣੀ ਖ਼ਾਨਦਾਨ ਦੀ ਪਿੱਠ ਪੂਰਨ ਲਈ ਸ਼ਹੀਦ ਊਦਮ ਸਿੰਘ ਜਾਂ ਮੌਜੂਦਾ ਸਮੇਂ ਦੇ ਕਿੰਨਿਆਂ ਕੌਮੀ ਸੂਰਮਿਆਂ ਤੇ ਉਂਗਲ ਧਰਨ ਦਾ ਇਰਾਦਾ ਧਰ ਕੇ , ਕਿਉਂ ਕੌਮ ਦੀ ਪਿੱਠ ਵਿੱਚ ਛੁਰੇ ਘੌਪਣ ਦਾ ਕਿਤਨਾ ਕੁ ਗਹਿਰਾ ਇਰਾਦਾ ਬਣਾਈ ਜਾ ਰਹੇ ਹਨ ? 1947 ਸਮੇਂ ਦੀ ਪੰਡਤ ਜਵਾਹਰ ਲਾਲ ਨਹਿਰੂ ਦੀ ਇਕ ਵੀਡੀਓ , ਅੰਗਰੇਜ਼ਾਂ ਸਾਹਮਣੇ ਬੇਨਤੀ ਕਰਦੇ ਦੀ ਸਾਹਮਣੇ ਆਈ ਤੇ ਪਤਾ  ਚੱਲਿਆ ਕਿ ਉਹ ਆਜ਼ਾਦੀ ਸੰਘਰਸ਼ ਨੇਤਾ ਸੁਬਾਸ਼ ਚੰਦਰ ਨੂੰ ਅੰਗਰੇਜ਼ ਸਾਮਰਾਜ ਦਾ ਵਿਰੋਧੀ ਅਤੇ ਅੱਤਵਾਦੀ ਕਹਿਕੇ , ਅੰਗਰੇਜ਼ਾਂ ਨਾਲ ਵਾਇਦਾ ਕਰ ਰਹੇ ਹਨ ਕਿ ਜਦ ਭੀ “ਸੁਭਾਸ਼ ਚੰਦਰ  ਹੋਸ਼ “ ਸਾਡੇ ( ਭਾਵ ਨਹਿਰੂ ਸਰਕਾਰ ) ਦੇ ਹੱਥ ਆਇਆ ਅਸੀਂ ਉਸ ਨੂੰ ਅੱਤਵਾਦੀ ਅਤੇ ਅੰਗਰੇਜ਼ ਸਾਮਰਾਜ  ਵਿਰੋਧੀ ਦੋਸ਼ੀ ਬਤੌਰ ਅੰਗਰੇਜ਼ਾਂ ਹਵਾਲੇ ਕਰਾਂਗੇ ।ਮਾਨ ਸਾਹਿਬ ਦੀ ਰਾਜੀਵ ਗਾਂਧੀ ਨਾਲ ਪਾਰਲੀਮੈਂਟ ਮੈਂਬਰ ਬਣ ਕੇ 1990 ਦੀ ਮਿਲਣੀ ਦੀ ਪ੍ਰਕਾਸ਼ਤ ਹੋਈ ਤਸਵੀਰ ਵੀ ਨਹਿਰੂ ਖ਼ਾਨਦਾਨ ਨਾਲ ਕਿਸ ਪੱਖ ਦਾ ਪਿਛੋਕੜ ਦਰਸਾ ਰਹੀ ਹੈ , ਕੀ ਕੋਈ ਅਜੇ ਸ਼ੱਕ ਬਾਕੀ ਹੈ । ਸੰਗਰੂਰ ਦੇ ਬਹੁ ਪੱਖੀ ਵੋਟਰਾਂ ਦੇ ਦਿਲ ਵਿੱਚ ਹੁਣ ਕੀ ਪਛਤਾਵਾ ਹੋ ਰਿਹਾ ਹੋਵੇਗਾ ਕਿ ਉਹਨਾਂ ਕਿਹੋ ਜਿਹਾ ਨੁਮਾਇੰਦਾ ਚੁਣ ਲਿਆ , ਜਿਸ ਨੇ ਲੋਕਾਂ ਦੇ ਦਿਲਾਂ ਦੀ  ਚਾਹਤ ਦੇ ਆਜ਼ਾਦੀ ਸ਼ੰਗਰਸ਼ ਦੇ ਦੇਵਤਿਆਂ ਦੇ ਸੁਨਹਿਰੀ ਇਤਿਹਾਸ ਦੇ ਪੰਨਿਆਂ ਨੂੰ ਹੀ ਰੋਲਣਾ ਸ਼ੁਰੂ ਕਰ ਦਿੱਤਾ ਹੈ । ਲੋਕ ਉਮੀਦਵਾਰ , ਨੁਮਾਇੰਦੇ ਨੂੰ ਸੋਨਾ ਸਮਝਣ ਦੀ ਗਲਤੀ ਕਰ ਬੈਠੇ , ਪਰ ਜਦ ਅੱਜ ਤਸਵੀਰ ਸਾਹਮਣੇ ਆਈ ਤਾਂ ਇਹੀ ਸਾਬਤ ਹੋਇਆ - “ਉਘੜ ਗਿਆ ਜੈਸੇ ਖੋਟਾ ਡਬੂਆ , ਜਾਂ ਨਜ਼ਰ ਸਰਾਫ਼ੇ ਆਇਆ “ ।
 ਪਰਮਿੰਦਰ ਸਿੰਘ ਬਲ --  ਪ੍ਰੂਫ਼ ਚੈੱਕ — ਜਹਾਦ ਵਿਡਣਗੇ

ਰਾਸ਼ਟਰਪਤੀ ਚੋਣ ਚ ਨਹੀਂ ਪਾਈ ਵੋਟ
*ਕਿਹਾ ਕੇਂਦਰ ਸਰਕਾਰ ਨੇ ਸਾਡੇ ਤੇ ਧੱਕੇ ਕੀਤੇ ਨੇ
ਮੁੱਲਾਂਪੁਰ ਦਾਖਾ, 18 ਜੁਲਾਈ ( ਸਤਵਿੰਦਰ ਸਿੰਘ ਗਿੱਲ)
ਲੰਘੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਵਿਚ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੀ ਸੂਬੇ ਦੇ ਮਾਲਵਾ ਇਲਾਕੇ ਵਿਚੋਂ ਇਜ਼ਤ ਰੱਖਣ ਵਾਲੇ ਹਲਕਾ ਦਾਖਾ ਤੋਂ ਜੇਤੂ ਰਹੇ ਵਿਧਾਇਕ ਮਨਪ੍ਰੀਤ ਸਿੰਘ ਇਆਲੀ ਨੇ ਅੱਜ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਵਲੋਂ ਰਾਸ਼ਟਰਪਤੀ ਦੀ ਹੋ ਰਹੀ ਚੋਣ ਲਈ ਪਾਰਟੀ ਪ੍ਰਧਾਨ ਸੁਖਬੀਰ ਬਾਦਲ ਵੱਲੋਂ ਭਾਰਤੀ ਜਨਤਾ ਪਾਰਟੀ ਦੀ ਅਗਵਾਈ ਵਾਲੀ ਐਨ ਡੀ ਏ ਸਰਕਾਰ ਦੀ ਦੇਸ਼ ਦੇ ਸਰਵਉਚ ਅਹੁਦੇ ਰਾਸ਼ਟਰਪਤੀ ਦੀ ਉਮੀਦਵਾਰ ਦਰੋਪਾਉਦੀ ਮੁਰਮੂ ਨੂੰ ਵੋਟ ਪਾਉਣ ਲਈ ਕੀਤੇ ਐਲਾਨ ਨੂੰ ਦਰਕਿਨਾਰ ਕਰਕੇ ਵੋਟ ਨਾ ਪਾਉਣ ਦਾ ਐਲਾਨ ਕੀਤਾ ਹੈ। ਸਿੱਖ ਕੌਮ ਦੀਆਂ ਭਾਵਨਾਵਾਂ ਦੇ ਨਾਲ ਪੰਜਾਬ ਦੇ ਅਹਿਮ ਮੁੱਦਿਆਂ ਅਤੇ ਆਪਣੀ ਜ਼ਮੀਰ ਦੀ ਆਵਾਜ਼ ਦਾ ਜ਼ਿਕਰ ਕਰਦਿਆਂ ਸ੍ਰ ਮਨਪ੍ਰੀਤ ਸਿੰਘ ਇਆਲੀ ਨੇ ਅੱਜ ਸੋਸ਼ਲ ਮੀਡੀਆ ਤੇ ਲਾਈਵ ਹੋ ਕੇ ਕਰੀਬ 8 ਮਿੰਟ ਦੇ ਆਪਣੇ ਇਸ ਐਲਾਨ ਰਾਹੀਂ ਪੰਜਾਬ ਦੇ ਵੱਖ ਵੱਖ ਮੁੱਦਿਆਂ, ਸਿੱਖ ਕੌਮ ਦੇ ਭਖਵੇਂ ਮਸਲੇ ਤੇ ਭਾਵਨਾਵਾਂ ਦਾ ਖੁੱਲ੍ਹ ਕੇ ਜਿਕਰ ਕੀਤਾ। ਉਨ੍ਹਾਂ ਕਿਹਾ ਕਿ ਭਾਜਪਾ ਦਾ ਪਾਰਟੀ ਨੇ ਸਮਰਥਣ ਕੀਤਾ ਹੈ ਪਰ ਇਸ ਵਿਸ਼ੇ ਤੇ ਮੇਰੀ ਰਾਏ ਨਹੀਂ ਲਈ ਗਈ, ਭਾਜਪਾ ਸਾਡੀ ਸਹਿਜੋਗੀ ਰਹੀ ਪਰ ਕੇਂਦਰ ਸਰਕਾਰ ਨੇ ਸਾਡੇ ਕੋਈ ਮਸਲੇ ਹੱਲ ਨਹੀਂ ਕੀਤੇ ਬਲਕਿ ਸਾਡੇ ਨਾਲ ਧੱਕੇ ਕੀਤੇ ਹਨ। ਉਨ੍ਹਾ ਲੰਬਾ ਸਮਾਂ ਦੇਸ਼ ਵਿੱਚ ਰਾਜ ਕਰਨ ਵਾਲੀ ਕਾਂਗਰਸ ਦੀ ਸਿੱਖ ਕੌਮ ਖਾਸ ਕਰਕੇ ਅਤੇ ਪੰਜਾਬ ਉੱਪਰ ਕੀਤੇ ਜੁਲਮਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਇਨ੍ਹਾਂ ਦੇ ਉਮੀਦਵਾਰ ਨੂੰ ਵੋਟ ਪਾਉਣ ਦਾ ਤਾਂ ਸਵਾਲ ਹੀ ਪੈਦਾ ਨਹੀਂ ਹੁੰਦਾ। ਇਸ ਐਲਾਨ ਦੇ ਨਾਲ ਨਾਲ ਸ੍ਰ ਮਨਪ੍ਰੀਤ ਸਿੰਘ ਇਆਲੀ ਨੇ ਆਪਣੀ ਪਾਰਟੀ ਦੀ ਪ੍ਰਧਾਨਗੀ ਦੇ ਅਹੁਦੇ ਸੰਬੰਧੀ ਵੀ ਸਾਫ ਕਰ ਦਿੱਤਾ ਕਿ 100 ਹਲਕਿਆਂ ਵਾਲੀ ਸ੍ਰ ਝੂੰਧਾ ਦੀ ਲੋਕਾਂ ਦੀਆਂ ਭਾਵਨਾਵਾਂ ਵਾਲੀ ਰੀਪੋਰਟ ਨੂੰ ਦੇਖਦਿਆਂ ਅਗਰ ਪਾਰਟੀ ਲੀਡਰਸ਼ਿਪ ਬਦਲੀ ਜਾਂਦੀ ਤਾਂ ਅੱਜ ਅਸੀਂ ਵਿਧਾਨ ਸਭਾ ਵਿਚ 3 ਹੀ ਨਾ ਰਹਿੰਦੇ। ਚੰਗਾ ਹੁੰਦਾ ਕਿ ਅਸੀਂ ਰਾਜਸੱਤਾ ਪਿੱਛੇ ਭੱਜਣ ਤੋਂ ਪਹਿਲਾਂ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਸਮਝਦੇ। ਸ੍ਰ ਇਆਲੀ ਦੇ ਇਸ ਫੈਸਲੇ ਦਾ ਸਮਰਥਨ ਕਰਦਿਆਂ ਅਮਰਜੀਤ ਸਿੰਘ ਮੁੱਲਾਂਪੁਰ ਸਾਬਕਾ ਚੇਅਰਮੈਨ, ਪ੍ਰਧਾਨ ਬਲਦੇਵ ਕ੍ਰਿਸ਼ਨ ਅਰੋੜਾ, ਸਾਬਕਾ ਕੌਂਸਲਰ ਸੱਜਣ ਬਾਂਸਲ, ਸਰਵਰਿੰਦਰ ਚੀਮਾ ਸਾਬਕਾ ਪ੍ਰਧਾਨ ਦੁਕਾਨਦਾਰ ਯੂਨੀਅਨ ਮੁੱਲਾਂਪੁਰ ਦਾਖਾ, ਸੁਸ਼ੀਲ ਕੁਮਾਰ ਵਿੱਕੀ ਚੌਧਰੀ ਸਾਬਕਾ ਕੌਂਸਲਰ ਅਤੇ ਸਮੂਹ ਮੁੱਲਾਂਪੁਰ ਸ਼ਹਿਰ ਦੀ ਅਕਾਲੀ ਦਲ ਲੀਡਰਸ਼ਿਪ ਨੇ ਕਿਹਾ ਕਿ ਸ੍ਰ ਮਨਪ੍ਰੀਤ ਸਿੰਘ ਇਆਲੀ ਵੱਲੋਂ ਲਿਆ ਗਿਆ ਇਹ ਫੈਸਲਾ ਬਿਲਕੁੱਲ ਸਹੀ ਅਤੇ ਦਲੇਰਾਨਾ ਕਦਮ ਹੈ ਜਿਸ ਲਈ ਸ੍ਰ ਇਯਾਲੀ ਵਧਾਈ ਦੇ ਹੱਕਦਾਰ ਹਨ।

 ਜਗਰਾਉਂ (ਬਲਦੇਵ ਸਿੰਘ, ਸੁਨੀਲ ਕੁਮਾਰ) ਅੱਜ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਸ਼ੇਰਪੁਰ ਕਲਾਂ ਦੇ  ਪ੍ਰਿੰਸੀਪਲ ਵਿਨੋਦ ਕੁਮਾਰ ਜੀ ਦੀ ਅਗਵਾਈ ਹੇਠ ਸਕੂਲ ਵਿਖੇ ਵਣਮਹਾਂ ਉਤਸਵ ਮਨਾਇਆ ਗਿਆ। ਵਿਦਿਆਰਥੀਆਂ ਦੇ ਸਹਿਯੋਗ ਸਦਕਾ ਸਕੂਲ ਵਿਖੇ ਲਗਭਗ ਸੱਤਰ ਬੂਟੇ ਲਗਾਏ ਗਏ ਹਨ। ਇਸ ਮੌਕੇ  ਪ੍ਰਿੰਸੀਪਲ ਵਿਨੋਦ ਕੁਮਾਰ ,ਲੈਕਚਰਾਰ ਕੰਵਲਜੀਤ ਸਿੰਘ, ਬਲਦੇਵ ਸਿੰਘ,ਕੁਲਵਿੰਦਰ ਕੌਰ,  ਸੀਮਾਂ ਸ਼ੈਲੀ, ਰਵਿੰਦਰ ਕੌਰ, ਕਿਰਨਜੀਤ ਕੌਰ, ਸਰਬਜੀਤ ਕੌਰ, ਮਨਰਮਨ ਕੌਰ, ਗੁਰਿੰਦਰ ਛਾਬੜਾ, ਪ੍ਰਗਟ ਸਿੰਘ, ਹਰਮਿੰਦਰ ਸਿੰਘ, ਮਨਦੀਪ ਸਿੰਘ ਅਤੇ ਵਿਦਿਆਰਥੀ ਵਰਗ ਹਾਜਰ ਸੀ।

ਜਗਰਾਉ,ਹਠੂਰ,18,ਜੁਲਾਈ-(ਕੌਸ਼ਲ ਮੱਲ੍ਹਾ)-ਇਲਾਕੇ ਦੀ ਨਾਮਵਾਰ ਵਿਿਦਅਕ ਸੰਸਥਾ ਬੀ. ਬੀ. ਐਸ. ਬੀ. ਕਾਨਵੈਂਟ ਸਕੂਲ ਸਿਧਵਾਂ ਬੇਟ ਜੋ ਕਿ ਸਿੱਖਿਆ ਦੇ ਖੇਤਰ ਵਿੱਚ ਇੱਕ ਮੋਹਰੀ ਸੰਸਥਾ ਬਣ ਚੁੱਕੀ ਹੈ ਅਤੇ ਪਿਛਲੇ ਬਾਰਾਂ ਸਾਲਾਂ ਤੋਂ ਆਪਣੀਆਂ ਸੇਵਾਵਾਂ ਪ੍ਰਦਾਨ ਕਰ ਰਹੀ ਹੈ। ਇਸ ਸੰਸਥਾ ਦੇ ਕੱਲ੍ਹ ਐਤਵਾਰ ਨੂੰ ਐਲਾਨੇ ਗਏ ਆਈ. ਸੀ. ਐਸ. ਈ ਬੋਰਡ ਦੇ ਨਤੀਜਿਆਂ ਵਿੱਚ ਸ਼ਾਨਦਾਰ ਸਫਲਤਾ ਪ੍ਰਾਪਤ ਕਰਦਿਆਂ ਨਵਂੇ ਕੀਰਤੀਮਾਨ ਸਥਾਪਿਤ ਕੀਤੇ।ਇਸ ਸਬੰਧੀ ਜਾਣਕਾਰੀ ਦਿੰਦਿਆ ਚੇਅਰਮੈਨ ਸਤੀਸ ਕਾਲੜਾ ਨੇ ਦੱਸਿਆ ਕਿ ਬੋਰਡ ਦੇ ਆਈ. ਸੀ. ਐਸ. ਸੀ. (ਦਸਵੀਂ) ਜਮਾਤ ਵਿੱਚ ਗੁਰਲੀਨ ਕੌਰ ਸੰਧੂ ਨੇ ਮੈਡੀਕਲ,ਨਾਨ ਮੈਡੀਕਲ ਗਰੁੱਪ ਵਿੱਚੋਂ 98% ਅੰਕ ਲੈ ਕੇ ਪਹਿਲਾ ਸਥਾਨ ਪ੍ਰਾਪਤ ਕੀਤਾ।ਇੰਦਰਵੀਰ ਕੌਰ ਨੇ 96.4% ਅੰਕ ਲੈ ਕੇ ਦੂਜਾ, ਗੁਰਨੂਰ ਸਿੰਘ ਨੇ 96.2% ਅੰਕ ਲੈ ਕੇ ਤੀਜਾ ਅਤੇ ਜੈਸਮੀਨ ਕੌਰ ਨੇ 93.4% ਅੰਕ ਲੈ ਕੇ ਚੌਥਾ ਸਥਾਨ ਪ੍ਰਾਪਤ ਕੀਤਾ। ਇਸੇ ਤਰ੍ਹਾਂ ਹੀ ਕਾਮਰਸ ਗਰੁੱਪ ਵਿੱਚੋਂ ਵੀ ਪੁਨੀਤ ਕੌਰ ਨੇ 97.2% ਅੰਕ ਲੈ ਕੇ ਪਹਿਲਾ, ਡੋਲਪ੍ਰੀਤ ਕੌਰ ਨੇ 95% ਅੰਕ ਲੈ ਕੇ ਦੂਜਾ ਜੀਵਨਜੋਤ ਕੌਰ ਨੇ 94.4% ਅੰਕ ਲੈ ਕੇ ਤੀਜਾ ਅਤੇ ਜੋਬਨਪ੍ਰੀਤ ਕੌਰ ਨੇ 94% ਅੰਕ ਲੈ ਕੇ ਚੌਥਾ ਸਥਾਨ ਪ੍ਰਾਪਤ ਕੀਤਾ।ਇਸ ਮੌਕੇ ਸਕੂਲ ਦੀ ਪ੍ਰਿੰਸੀਪਲ ਅਨੀਤਾ ਕੁਮਾਰੀ ਜੀ ਨੇ ਸਮੂਹ ਵਿਿਦਆਰਥੀਆ ਅਤੇ ਅਧਿਆਪਕਾ ਨੂੰ ਊਹਨਾਂ ਦੀ ਅਣਥੱਕ ਮਿਹਨਤ ਤੇ ਵਧਾਈ ਦਿੰਦਿਆ ਕਿਹਾ ਕਿ ਬੇਟ ਇਲਾਕੇ ਵਿੱਚ ਆਈ. ਸੀ. ਐਸ. ਈ. ਬੋਰਡ ਵਿੱਚੋ 98% ਅੰਕ ਪ੍ਰਾਪਤ ਕਰਨਾ ਕੋਈ ਸੌਖਾ ਕੰਮ ਨਹੀ ਹੈ । ਉਹਨਾਂ ਬੱਚਿਆ ਨੂੰ ਇਸੇ ਤਰਾ੍ਹ ਹੀ ਮਿਹਨਤ ਕਰਨ ਅਤੇ ਹੋਰ ਵੀ ਚੰਗੇ ਅੰਕ ਪ੍ਰਾਪਤ ਕਰਨ ਲਈ ਪ੍ਰੇਰਿਤ ਕੀਤਾ।ਇਸ ਮੋਕੇ ਚੇਅਰਮੈਨ ਸਤੀਸ ਕਾਲੜਾ ਨੇ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਸਕੂਲ ਦੇ ਇਹਨਾ ਸ਼ਾਨਦਾਰ ਨਤੀਜਿਆ ਦਾ ਸਿਹਰਾ ਸਕੂਲ ਦੇ ਪਿੰ੍ਰਸੀਪਲ ਅਨੀਤਾ ਕੁਮਾਰੀ ਦੀ ਅਣਥੱਕ ਮਿਹਨਤ ਅਤੇ ਸਮੇਂ-ਸਮੇਂ ਤੇ ਵਿਿਦਆਰਥੀਆਂ ਤੇ ਸਟਾਫ ਦਾ ਕੀਤਾ ਮਾਰਗ ਦਰਸ਼ਨ ਨੂੰ ਹੀ ਜਾਂਦਾ ਹੈ। ਊਹਨਾ ਨੇ ਸਮੂਹ ਵਿਿਦਆਰਥੀਆ ਤੇ ਮਾਪਿਆ ਨੂੰ ਇਸ ਸਫਲਤਾ ਤੇ ਵਧਾਈ ਦਿੰਦੇ ਹੋਏ ਇਹ ਵਿਸ਼ਵਾਸ਼ ਦੁਆਇਆ ਕਿ ਇਸ ਸੰਸਥਾ ਵੱਲੋ ਅੱਗੇ ਤੋ ਹੋਰ ਵੀ ਮਿਹਨਤ ਤੇ ਲਗਨ ਨਾਲ ਹੋਰ ਵੀ ਸ਼ਾਨਦਾਰ ਨਤੀਜਿਆ ਨੂੰ ਪ੍ਰਾਪਤ ਕੀਤਾ ਜਾਵੇਗਾ।ਇਸ ਮੌਕੇ ਉਨ੍ਹਾ ਨਾਲ ਸਕੂਲ ਚੇਅਰਮੈਨ ਸਤੀਸ ਕਾਲੜਾ ਪ੍ਰਾਧਾਨ ਰਜਿੰਦਰ ਬਾਵਾ, ਵਾਈਸ ਚੇਅਰਮੈਨ ਹਰਕ੍ਰਿਸ਼ਨ ਭਗਵਾਨਦਾਸ ਬਾਵਾ, ਵਾਈਸ ਪ੍ਰੈਜ਼ੀਡੈਂਟ ਸਨੀ ਅਰੋੜਾ, ਮੈਨੇਜਿੰਗ ਡਾਇਰੈਕਟਰ ਸ਼ਾਮ ਸੁੰਦਰ ਭਾਰਦਵਾਜ, ਅਤੇ ਡਇਰੈਕਟਰ ਰਾਜੀਵ ਸੱਗੜ ਸਮੂਹ ਮੈਨਜਮੈਂਟ ਮੈਂਬਰਜ ਨੇ ਵਿਿਦਆਰਥੀਆ ਅਤੇ ਉਹਨਾ ਦੇ ਮਾਪਿਆ ਨੂੰ ਸਾਨਦਾਰ ਨਤੀਜੇ ਪ੍ਰਾਪਤ ਕਰਨ ਤੇ ਵਧਾਈ ਦਿੱਤੀ ਅਤੇ ਭਵਿੱਖ ਵਿੱਚ ਵੀ ਅਜਿਹੇ ਸ਼ਾਨਦਾਰ ਨਤੀਜੇ ਪ੍ਰਾਪਤ ਕਰਨ ਦੀ ਕਾਮਨਾ ਵੀ ਕੀਤੀ।

ਹਠੂਰ,18,ਜੁਲਾਈ-(ਕੌਸ਼ਲ ਮੱਲ੍ਹਾ)-ਭਾਰਤੀ ਕਿਸਾਨ ਯੂਨੀਅਨ (ਏਕਤਾ) ਡਕੌਂਦਾ ਦੇ ਬਲਾਕ ਮੀਤ ਪ੍ਰਧਾਨ ਮਾਸਟਰ ਮਨਦੀਪ ਸਿੰਘ ਭੰਮੀਪੁਰਾ ਦੀ ਅਗਵਾਈ ਹੇਠ ਪਿੰਡ ਭੰਮੀਪੁਰਾ ਕਲਾਂ ਵਿਖੇ ਛਾਂਦਾਰ ਅਤੇ ਫਲਦਾਰ ਬੂਟੇ ਲਾਏ ਗਏ।ਇਸ ਮੌਕੇ ਗੱਲਬਾਤ ਕਰਦਿਆ ਮਾਸਟਰ ਮਨਦੀਪ ਸਿੰਘ ਭੰਮੀਪੁਰਾ ਨੇ ਦੱਸਿਆ ਕਿ ਪਿਛਲੇ ਲੰਮੇ ਸਮੇਂ ਤੋ ਪਿੰਡ ਦੀ ਬੇਅਬਾਦ ਪਈ ਸਾਝੀ ਇੱਕ ਏਕੜ ਜਮੀਨ ਵਿਚ ਸੋਮਵਾਰ ਨੂੰ ਦੋ ਸੌ ਛਾਂਦਾਰ,ਫਲਦਾਰ ਅਤੇ ਰਵਾਇਤੀ ਬੂਟੇ ਲਾਏ ਗਏ ਹਨ ਅਤੇ ਆਉਣ ਵਾਲੇ ਦਿਨਾ ਵਿਚ ਤਿੰਨ ਸੌ ਬੂਟੇ ਹੋਰ ਲਾਏ ਜਾਣਗੇ।ਉਨ੍ਹਾ ਦੱਸਿਆ ਕਿ ਇਨ੍ਹਾ ਬੂਟਿਆ ਨੂੰ ਪਾਲਣ ਲਈ ਵੱਖ-ਵੱਖ ਟੀਮਾ ਬਣਾਇਆ ਗਈਆ ਹਨ ਜੋ ਸਮੇਂ ਸਿਰ ਪਾਣੀ ਅਤੇ ਖਾਦ ਪਾਉਣ ਦੀ ਜਿਮੇਵਾਰੀ ਨਿਭਾਉਣਗੀਆ।ਉਨ੍ਹਾ ਸਮੂਹ ਪਿੰਡ ਵਾਸੀਆ ਨੂੰ ਬੂਟੇ ਪਾਲਣ ਵਿਚ ਸਹਿਯੋਗ ਦੇਣ ਲਈ ਦੀ ਬੇਨਤੀ ਕੀਤੀ।ਇਸ ਮੌਕੇ ਉਨ੍ਹਾ ਨਾਲ ਪ੍ਰਧਾਨ ਸੁਰਿੰਦਰ ਸਿੰਘ ਸੱਗੂ,ਰਘਵੀਰ ਸਿੰਘ,ਨਿਰਮਲ ਸਿੰਘ,ਦਵਿੰਦਰ ਸਿੰਘ,ਲਖਵੀਰ ਸਿੰਘ,ਗੁਰਜੀਤ ਸਿੰਘ,ਪ੍ਰਦੀਪ ਸਿੰਘ,ਹਰਨਾਮ ਸਿੰਘ,ਗੁਰਜੀਤ ਸਿੰਘ,ਕੁਲਵਿੰਦਰ ਸਿੰਘ,ਰਾਣਾ ਸਿੰਘ,ਜੱਸਾ ਸਿੰਘ ਆਦਿ ਹਾਜ਼ਰ ਸਨ।